កីឡាករប្រដាល់រុស្ស៊ីម្នាក់ ទទួលមរណភាព បន្ទាប់ពីរងរបួសឈាមហូរចូលក្នុងខួរក្បាល ក្នុងអំឡុងការប្រកួត

៣ ឆ្នាំមុន

ខែកក្កដា ២៥, ២០១៩ កីឡា

កីឡាករប្រដាល់រុស្ស៊ី Maxim Dadashev បានទទួលមរណភាពក្នុងវ័យ ២៨ឆ្នាំ បន្ទាប់ពីរងរបួសធ្ងន់ធ្ងរក្នុងការប្រកួតប្រភេទទម្ងន់ស្រាលរបស់ស្ថាប័ន IBF ជាមួយកីឡាករ Subriel Matias។

កីឡាករ Dadashev ត្រូវបានគេរាយការណ៍ថា មិនអាចដើរទៅបន្ទប់ផ្លាស់ប្ដូរសំលៀកបំពាក់រួច បន្ទាប់ពីការប្រកួតដែលត្រូវបានបញ្ឈប់ដោយគ្រូបង្វឹករបស់គេ លោក Buddy McGirt នៅចុងទឹកទី១១ កាលពីថ្ងៃសុក្រ។
គេត្រូវបានបញ្ជូនទៅមន្ទីរពេទ្យ ដោយសារឈាមហូរចូលក្នុងខួរក្បាល និងទទួលការវះកាត់ជាបន្ទាន់ ប៉ុន្តែមិនបានជោគជ័យ។

កីឡាករ Dadashev ដែលរស់នៅសហរដ្ឋអាមេរិក បានឈ្នះការប្រកួតទាំង ១៣លើករបស់គេ ប៉ុន្តែត្រូវកណ្ដាប់យ៉ាងច្រើនពីសំណាក់កីឡាករ Matias ក្នុងអំឡុងការប្រកួតនៅរដ្ឋ Maryland។

លោក McGirt ដែលជាគ្រូបង្វឹករបស់កីឡាកររូបនេះ បាននិយាយថា បន្ទាប់ពី “លោកមិនអាចបញ្ចុះបញ្ចូល” កីឡាកររបស់លោកឱ្យឈប់ លោកបានសម្រេចចិត្តបោះកន្សែងសុំចុះចាញ់ នៅពេលដែលលោកឃើញ Dadashev”ត្រូវវាយច្រើន និងមិនអាចតដៃបាន”៕