ឆេះទូកទេសចរណ៍ទំនើប ១គ្រឿង នៅថៃ (មានវីដេអូ)

ភូកេត៖ ទូកទេសចរណ៍១គ្រឿង ដែលមានតម្លៃជាង ១០០លានបាត (ជាង ៣លានដុល្លារអាមេរិក) ត្រូវបានអគ្គិភ័យឆាបឆេះ នៅកំពង់ផែមួយ នៅស្រុក Thalang ខេត្តភូកេត ប្រទេសថៃ នៅថ្ងៃពុធ ទី៧ ខែសីហា ឆ្នាំ២០១៩ នេះ។

ក្រុមពន្លត់អគ្គិភ័យ បានធ្វើអន្តរាគមន៍លើទូកដែលមានបណ្ដោយ ៥៥ម៉ែត្រ ឈ្មោះ Lady D ហើយបានកាត់ផ្តាច់ខ្សែចងភ្ជាប់ ដើម្បីឱ្យទូកអណ្ដែតឆ្ងាយពីទូកដទៃទៀត ជៀសវាងឆេះរីករាលដាល។

អាជ្ញាធរថៃ បានឱ្យដឹងថា ទូកកម្សាន្តនេះ បានធ្វើដំណើរចាកចេញពីប្រទេសម៉ាឡេស៊ី មកដល់ប្រទេសថៃ កាលពីពេលថ្មីៗនេះ។ ពួកគេ មិនទាន់អាចបញ្ជាក់ពីមូលហេតុបង្កជាអគ្គិភ័យនោះទេ។ ទូកនេះ បើកដោយក្រុមជនជាតិកាណាដា ហើយបានចុះបញ្ជីនៅចក្រភពអង់គ្លេស។ គេដឹងថា ម្ចាស់ទូក មិនមែនជាជនជាតិថៃ ឡើយ។ មកទល់ពេលនេះ មិនមានសេចក្ដីរាយការណ៍ ពីអ្នករងរបួស ឬ ស្លាប់ទេ៕

សូមទស្សនាវីដេអូ៖ 

ប្រភព៖ Bangkok Post

ប្រែសម្រួល៖ ចាន់ សោភ័ណ្ឌលាភ