Connect with us

តំបន់មួយចំនួន នៅខេត្តមណ្ឌលគិរី ត្រូវបានលិចលង់

ផ្លូវ ស្ពាន សាលារៀន លិចអស់ហើយ

មណ្ឌលគិរី៖ រយៈពេលប្រមាណ ៤ថ្ងៃមកហើយ ខេត្តមណ្ឌលគិរី ស្ទើរតែគ្មានពន្លឺព្រះអាទិត្យ ព្រោះតែសម្ពាធអាកាសនៅតែបន្តគ្របដណ្ដប់ដោយផ្ទៃមេឃស្រទំ និងភ្លៀងពីរលឹមទៅខ្លាំង។ លក្ខណៈបែបនេះបានធ្វើឱ្យតំបន់មួយ ចំនួននៅស្រុកចំនួន៣ គឺស្រុកកោះញែក ស្រុកកែវសីមា និងតំបន់ព្រំដែនកម្ពុជា-វៀតណាម ក្នុងស្រុកពេជ្រាដា កំពុងរងនូវជំនន់ទឹកភ្លៀង។ នេះបើតាមអត្ថបទព័ត៌មានរបស់មន្ទីរព័ត៌មានខេត្តមណ្ឌលគិរី។

គិតត្រឹមព្រឹកថ្ងៃទី៨ ខែសីហា ភូមិចំនួន៤ ក្នុងឃុំណងឃីលឹក ស្រុកកោះញែក កំពុងរងផលប៉ះពាល់ពីទឹកជំនន់តាំងពីល្ងាចម្សិលមិញ ហើយសាលារៀនកោះម្យើល និងសាលាជ្រៃសែន ត្រូវផ្អាកការសិក្សាមួយពេលសិន ព្រោះទឹក កំពុងជន់លិចមិនថមថយទៅវិញ។ ផ្លូវនិងស្ពាន ឆ្ពោះទៅកាន់ភូមិកោះម្យើលលើ និងភូមិកោះម្យើលក្រោម មានផ្នែកខ្លះ កំពុងមានទឹកហូរកាត់មិនអាចធ្វើដំណើរ។

ចំណែកនៅស្រុកកែវសីមាវិញ ទីតាំងមួយចំនួនកំពុងលិចលង់ ហើយស្ពានដែកដ៏សំខាន់ឆ្លងកាត់អូរទេរ ប្រវែង៦០ម៉ែត្រតភ្ជាប់រវាងឃុំមេម៉ង់ និងឃុំចុងផ្លាស់ ដែលជាផ្លូវច្រកសេដ្ឋកិច្ចតែមួយគត់ សម្រាប់ប្រជាពលរដ្ឋឆ្លងមកទីប្រជុំជនខេត្តមណ្ឌលគិរី ត្រូវបានទឹកជន់លិចអស់រយៈពេលរាប់សិបម៉ោង ក្រោយមានភ្លៀងមួយមេធំតាំងពីល្ងាចថ្ងៃទី០៦ សីហា៕

    

អត្ថបទ៖ ចាន់ សោភ័ណ្ឌលាភ

    Loading...

    ពេញនិយម