Connect with us

តម្លៃម្រេចនៅខេត្តរតនគិរីប​ន្ត​ធ្លាក់ចុះបន្ថែមទៀត​ នៅឆ្នាំ2018នេះ ប​ន្ទាប់ពី​បានធ្លាក់ចុះរយៈពេលប៉ុន្មានឆ្នាំជាប់ៗគ្នា

រតន:គីរី÷ តម្លៃម្រេចក្នុងខេត្តរតនគិរី​ បានបន្តធ្លាក់ចុះបន្ថែមទៀតនៅឆ្នាំ ២០១៨នេះ ធ្វើអោយកសិករដាំដំណាំម្រេចមានការព្រួយបារម្ភចំពោះអនាគតតម្លៃម្រេចដែលមានភាពស្រពិចស្រពិលនៅឡើយ។

លោកវ៉ាន់ សោភា ប្រជាកសិករដាំម្រេចនៅភូមិថ្មដា សង្កាត់បឹងកន្សែង ក្រុងបានលុង មានផ្ទៃដីដាំម្រេចចំនួនជាង៧ហិកតា បានអោយដឹងថា លោកកំពុងតែរំពឹងថា ឆ្នាំក្រោយ និងឆ្នាំបន្តបន្ទាប់ទៀត​ ម្រេចខេត្តរតនគីរី​ នឹងមានតម្លៃខ្ពស់ឡើងវិញ ហើយត្រូវបានធានាតម្លៃដូចម្រេចខេត្តកំពតដែរ។

តែទោះជាយ៉ាងណា ការរំពឹងរបស់លោក វ៉ាន់ សោភា ទំនងជាមិនអាចសម្រេចដូចបំណងនៅពេលនេះទេ ដោយសារតែស្ថានភាពទីផ្សារម្រេចនៅលើពិភពលោក ក៏កំពុងធ្លាក់ចុះជាបន្តបន្ទាប់ និងត្រូវបានព្យាករណ៏ថា មិនងាយឡើងថ្លៃវិញក្នុងរយៈពេលខ្លីនោះទេ។

អ្នកជំនាញផ្នែកកសិកម្មបានផ្តល់យោបល់ថា អាជីវកម្មលើដំណាំម្រេច មិនគួរពង្រីកទៀតឡើយនៅពេលនេះ​ ដោយសារតែការផ្គត់ផ្គង់ម្រេចនៅលើទីផ្សារអន្តរជាតិ មានភាពលើសលុបរួចទៅហើយ ដែលធ្វើឲ្យអាជីវកម្មថ្មីៗ ប្រឈមនឹងការប្រកួតប្រជែងខ្ពស់។

តម្លៃម្រេចនៅកម្ពុជាបានធ្លាក់ចុះស្របគ្នានឹងតម្លៃម្រេចនៅលើទីផ្សារអន្តរជាតិ ដោយធ្លាក់ចុះចាប់តាំងពីឆ្នាំ២០១៦មក។ សម្រាប់ម្រេចនៅខេត្តរតនគិរី មានតម្លៃ៣ម៉ឺនរៀលក្នុងមួយគីឡូក្រាមនៅឆ្នាំ២០១៦ ហើយបានធ្លាក់ចុះនៅត្រឹមជាង២ម៉ឺនរៀលក្នុង១គីឡូក្រាមនៅឆ្នាំ២០១៧ និងបន្តធ្លាក់ថ្លៃបន្ថែមទៀតមកនៅត្រឹមរង្វង់១ម៉ឺន១ពាន់រៀលប៉ុណ្ណោះនៅឆ្នាំ២០១៨នេះ។

លោក សយ សូណា ប្រធានមន្ទីរកសិកម្ម រុក្ខាប្រម៉ាញ់ និងនេសាទខេត្តរតនគិរី បានឲ្យដឹងថា ផ្ទៃដីដាំដុះនៅទូទាំង៩ក្រុង ស្រុក ក្នុងខេត្តរតនគិរី មានចំនួនជាង១ពាន់ហិកតា ពេល តម្លៃធ្លាក់ចុះដូច្នេះបានប៉ះពាល់ដល់ប្រាក់ចំណូលយ៉ាងច្រើនរបស់កសិករ៕

  • អត្ថបទទាក់ទង :
  • Featured
Loading...

ពេញនិយម