James Rodríguez ជាកីឡាករទី៩ របស់ Real Madrid ដែលរងរបួស

អេស៉្បាញ៖ ក្រុម Real Madrid បានបញ្ជាក់ថា កីឡាករ James Rodríguez រំពឹងថា នឹងត្រូវសម្រាកពី ២ ទៅ ៣ សប្តាហ៍ ដោយបញ្ហារបួសកំភួនជើង។

James ត្រូវបានប្តូរចេញនៅនាទីទី៥៧ នៃការប្រកួតស្មើ ១-១ ជាមួយក្រុម Real Valladolid កាលពីថ្ងៃសៅរ៍ ហើយសេចក្តីថ្លែងការណ៍មួយដែលចេញផ្សាយតាមរយៈគេហទំព័រផ្លូវការរបស់ក្លិបកាលពីថ្ងៃច័ន្ទបានឱ្យដឹងថា៖ “បន្ទាប់ពីធ្វើការពិនិត្យ គេត្រូវបានរកឃើញថា មានបញ្ហាសាច់ដុំនៅផ្នែកខាងស្តាំ ហើយការជាសះស្បើយរបស់កីឡាករនឹងបន្តវាយតម្លៃបន្ថែមទៀត”។ Jame គឺជាកីឡាកររបួសទី៩ ក្នុងក្រុមម៉ាឌ្រីដចាប់តាំងពីការចាប់ផ្តើមការប្រកួតមិត្តភាពមុនបើករដូវកាល ដែលក្នុងនោះ ៦ នាក់គឺមានបញ្ហាសាច់ដុំ។

ការរងរបួសនេះនឹងធ្វើឱ្យកីឡាកររូបនេះ ខកខានដល់ទៅ ២ ទៅ ៣ សប្តាហ៍មានន័យថា James ត្រូវបានរំពឹងថា នឹងខកខានការប៉ះជាមួយក្រុម Villarreal ស្របពេលការប្រកួតជម្រើសជាតិកូឡុំប៊ីជាមួយ ប្រេស៊ីល និងវេណេស៊ុយអេឡានឹងមកដល់ខាងមុខនេះ៕