សម្ដេចហ៊ុន សែន មានប្រសាសន៍ថា ភ្នំពេញនឹងមានចំណតរថយន្តក្រោមដី ៣ ឬ៤ជាន់

ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានបញ្ជាឱ្យរដ្ឋបាលរាជធានីភ្នំពេញ និងភាគីពាក់ព័ន្ធ រៀបចំបង្កើតចំណតរថយន្តក្រោមដី តាមរយៈក្រុមហ៊ុនឯកជនមួយចំនួន ដើម្បីកាត់បន្ថយការកកស្ទះចរាចរណ៍ និងជៀសវាងការចតគ្មានសណ្ដាប់ធ្នាប់។

សម្ដេចតេជោ ហ៊ុន សែន នាយករដ្ឋមន្ត្រី បានថ្លែងយ៉ាងដូច្នេះ នៅក្នុងពិធីប្រគល់សញ្ញាបត្រ ដល់និស្សិតសាកលវិទ្យាល័យបៀលប្រាយ នៅព្រឹកថ្ងៃចន្ទ ទី១៨ ខែវិច្ឆិកា ឆ្នាំ២០១៩ នេះ។

សម្ដេចតេជោ មានប្រសាសន៍ថា ឥឡូវកំពុងឱ្យសិក្សាសួនច្បារមួយចំនួន ដែលអាចធ្វើបាន ប្រគល់ឱ្យវិស័យឯកជនជីករូងក្រោមដី ធ្វើ ៣ ឬ ៤ជាន់។ ពាក់ព័ន្ធបច្ចេកទេស និងគុណភាពសាងសង់ សម្ដេច ហ៊ុន សែន បានជំរុញឱ្យមានការយកចិត្តទុកដាក់ខ្ពស់ ជាពិសេសបញ្ហាសុវត្ថិភាពជាចម្បង។ ចំណតក្រោមដី មិនត្រឹមតែជួយសម្រួលដល់សណ្ដាប់ធ្នាប់ចរាចរណ៍ប៉ុណ្ណោះទេ ប៉ុន្តែថែមទាំងជួយលើកសោភ័ណភាពទីក្រុង ឱ្យកាន់តែស្រស់ស្អាតមួយកម្រិតថែមទៀត៕

រូបតំណាង