ក្រោយចាញ់ហុងកុង លោក Felix និយាយពីការប្រកួត និងការផ្ដល់កាតក្រហមដល់ សឿយ វិសាល

ហុងកុង៖ លោក Felix Dalmas គ្រូបង្គោលក្រុមបាល់ទាត់ជម្រើសជាតិកម្ពុជា បានឆ្លើយតបនឹងសំណួរក្នុងសន្និសីទសារព័ត៌មាន ក្រោយចប់ការប្រកួតរវាង ក្រុមម្ចាស់ផ្ទះហុងកុង និងក្រុមគោលព្រៃ ដែលបញ្ចប់ដោយលទ្ធផល ២-០ ដោយខ្សែការពារ សឿយ វិសាល បានទទួលកាតលឿង ២ដង ស្មើនឹងកាតក្រហម ក្នុងការប្រកួត FIFA World Cup Qatar 2022 វគ្គជម្រុះ Preliminary Qualification Round 2 នៅកីឡដ្ឋានហុងកុង កាលពីម្សិលមិញ។

លោក Felix បាននិយាយថា៖ ” ថ្វីត្បិតយើងមិនអាចទទួលបានលទ្ធផលដែលយើងចង់បាន តែខ្ញុំពេញចិត្តនឹងរបៀបលេងរបស់កីឡាករ ដែលព្យាយាមលេងតាមទម្រង់ និងគ្រប់គ្រងបាល់។ ខ្ញុំមានអារម្មណ៍សោកស្ដាយ ដែលការខិតខំរបស់កីឡាករយើង មិនអាចទទួលបានលទ្ធផលដែលពួកគេសមទទួលបាន ព្រោះការប្រឹងប្រែងរបស់ពួកគេ”។

ពាក់ព័ន្ធនឹងការផ្ដល់កាតក្រហមដល់ សឿយ វិសាល លោក Felix បានឱ្យដឹងទៀតថា៖ “ខ្ញុំយល់ថា អាជ្ញាកណ្ដាល បានទទួលរងសម្ពាធយ៉ាងខ្លាំង។ ខ្ញុំមិនអាចនិយាយបានទេថា កាតក្រហមនេះ គឺជាកំហុស”៕

សូមទស្សនាវីដេអូ៖

អត្ថបទ៖ ចាន់ សោភ័ណ្ឌលាភ