Zidane បញ្ជាក់យ៉ាងច្បាស់ថា ក្លិបនឹងមិនទិញខ្សែប្រយុទ្ធថ្មីទៀតឡើយ

អេស៉្បាញ៖ លោក Zinedine Zidane បានឱ្យដឹងថា Real Madrid នឹងមិនចុះហត្ថលេខាលើខ្សែប្រយុទ្ធថ្មីជាដាច់ខាតនៅក្នុងខែមករា បន្ទាប់ពីក្រុមមិនអាចរកគ្រាប់បាល់បានពេលប៉ះនឹងក្លិប Athletic Bilbao ។

ខ្សែប្រយុទ្ធ Karim Benzema រកគ្រាប់បាល់បញ្ចូលទីសម្រាប់ក្រុមម៉ាឌ្រីដនៅរដូវកាលនេះដោយរកបាន ១២គ្រាប់ក្នុងលីហ្គ និង ១៦គ្រាប់ គ្រប់ការប្រកួតទាំងអស់ ខណៈពេលដែល Jovic រកបានតែ ១គ្រាប់ប៉ុណ្ណោះចាប់តាំងពីបានមកដល់រដ្ឋធានីអេស៉្បាញ។

ទោះយ៉ាងណាគ្រូបង្វឹកលោក Zidane បានច្រានចោលក្នុងការនាំយកខ្សែប្រយុទ្ធថ្មីបន្ថែមទៀត បើទោះជាក្រុម Los Blancos មើលទៅពិបាកនឹងដណ្តើមយកជើងឯក LaLiga ពី Barcelona ក្នុងអាណត្តិនេះ។ នៅពេលសួរថាតើគាត់នឹងស្នើសុំទិញខ្សែប្រយុទ្ធថ្មីដែរ ឬទេ? Zidane បានឆ្លើយតបថា៖ « ប្រាកដថា មិនហើយ! ខ្ញុំមិនចាំបាច់ត្រូវការចុះហត្ថលេខាលើខ្សែប្រយុទ្ធថ្មីទេ »។

ការប្រកួតស្មើជាមួយក្រុម Athletic Bilbao គឺជាលើកទី ៥ ហើយដែលក្រុមម៉ាឌ្រីដបានធ្លាក់ពីលើកំពូលតារាងនៅ LaLiga ក្នុងរដូវកាលនេះ ដោយបុរសរបស់ Zidane មានពីរពិន្ទុនៅពីក្រោយក្រុមកំពុងដឹកនាំ Barcelona ៕