តើខេត្តព្រះសីហនុ កំពុងក្លាយជាប៉ូលសេដ្ឋកិច្ចសំខាន់ថ្មីមួយទៀតរបស់កម្ពុជា មែនទេ?

ព្រះសីហនុ ៖ កំណើននៃការអភិវឌ្ឍន៏ខេត្តព្រះសីហនុរយៈកាលប៉ុន្មានឆ្នាំថ្មីៗនេះ កំពុងធ្វើអោយខេត្តមួយនេះ ក្លាយជាប៉ូលសេដ្ឋកិច្ចសំខាន់ទី២របស់កម្ពុជាជាបណ្ដើរៗហើយ បន្ទាប់ពីរាជធានីភ្នំពេញ។

មានការកត់សម្គាល់ថា ខេត្តព្រះសីហនុ កំពុងទាក់ទាញវិនិយោគយ៉ាងច្រើន ត្រឹមក្នុងរយៈពេលខ្លីប៉ុណ្ណោះ ដោយផ្តោតលើវិស័យទេសចរណ៏ រោងចក្រឧស្សាហកម្ម និង ការសាងសង់គម្រោងអាគារជាច្រើនផ្សេងទៀត ។

បើតាមការគ្រោងទុក ក្នុងរយៈពេលដ៏ខ្លីខាងមុខនេះ ខេត្តព្រះសីហនុ នឹងចាប់ផ្តើមសាងសង់គម្រោងផ្លូវល្បឿនលឿន, ការតភ្ជាប់ផ្លូវដែក, កំពង់ផែទឹកជ្រៅ និង ការពង្រីកព្រលានយន្ដហោះអន្តរជាតិជាដើម ដោយបានក្លាយជាច្រកភ្ជាប់សកម្មភាពពាណិជ្ជកម្មរបស់កម្ពុជាទៅកាន់ពិភពលោក ។

តាមការអោយដឹងពី ឯកឧត្តម យន្ដ មីន អភិបាលខេត្តព្រះសីហនុ បានបញ្ជាក់ថា បច្ចុប្បន្នខេត្តនេះ មានអាជីវកម្មផ្នែកទេសចរណ៍ជិត ៩០០អាជីវកម្ម ក្នុងនោះ សណ្ឋាគារមានចំនួន៧៩ ផ្ទះសំណាក់ មាន ៣៣៦ ភោជនីយដ្ឋានជាង ៣០០ទីតាំង និង កាស៊ីណូ កំពុងដំណើរការជាង១០០ទីតាំង ព្រមទាំងអាជីវកម្មផ្សេងៗទៀត ៕