លោក ខេម ពិតជាធ្វើអ្វីតាមដែលលោកបានសន្យាថា នឹងចែកភួយដល់ចាស់ជរាពិតប្រាកដមែន

ភ្នំពេញ៖ តារាចម្រៀងសំឡេងស្អក ប្រចាំផលិតកម្ម “ថោន” លោក ខេម បានចែកភួយដល់មនុស្សចាស់ជរា ព្រោះលោកបានឮថា ធាតុអាកាសនឹងចុះត្រជាក់នៅប៉ុន្មានថ្ងៃខាងមុខនេះ។

លោក ខេម បានធ្វើតាមការសន្យារបស់ខ្លួនពិតមែន ដោយកាលពីម្សិលមិញ លោកបានយកភួយជាច្រើនចែកជូនមនុស្សចាស់ជរា ដែលធាក់ស៊ីក្លូ ព្រមទាំងជូនជាថវិកាបន្តិចបន្តួចផងដែរ។ លោកជួបកន្លែងណា គឺលោកចុះចែកជូនតែម្តង មិនថាពេលព្រលប់ ឬ យប់ក៏ដោយ ក៏លោកនៅតែធ្វើជានិច្ច។ ហើយតារាចម្រៀងម្នាក់នេះ ក៏មានពាក្យខ្លះបង្ហាញចេញពីក្នុងចិត្ត ដោយនិយាយថា លោកពិតជាសប្បាយរីករាយ ព្រោះគ្មានអ្វីជាងធ្វើបុណ្យជាមួយចាស់ៗនោះទេ។

ពិតជាសរសើរដល់លោក ខេម ដែលខំចំណាយពេលវេលារបស់លោកសម្រាប់មនុស្សចាស់ជរា ទីទាល់ក្រ ទោះជាមិនធំដុំដូចគេក៏ដោយ ប៉ុន្តែនេះជាសន្តានចិត្តរបស់លោក។

យើងសង្កេតឃើញថា មួយរយៈនេះសិល្បករខ្មែរមួយចំនួន បាននាំគ្នាផ្ដល់ក្តីស្រឡាញ់ ចំពោះមនុស្សចាស់ជរា ដែលកំពុងតែជួបការលំបាក៕

អត្ថបទ៖ ឡុង រតនា