Kane នឹងត្រូវអវត្តមានច្រើនខែ ដោយសារវះកាត់របួសសរសៃពួរ

អង់គ្លេស៖ ខ្សែប្រយុទ្ធ Harry Kane របស់ក្លិប Tottenham Hotspur នឹងត្រូវអវត្តមានរហូតដល់ខែមេសា បន្ទាប់ពីក្លិប បានប្រកាសថា កីឡាកររូបនេះ ត្រូវការវះកាត់លើរបួសសរសៃពួរ។

ខ្សែប្រយុទ្ធវ័យ ២៦ឆ្នាំរូបនេះ បានរងរបួសអំឡុងពេលដែលក្រុមមាន់ខ្នាយមាស រងបរាជ័យនៅទឹកដី Southampton នាថ្ងៃចូលឆ្នាំថ្មី។ មិនមានពេលវេលាច្បាស់លាស់ណាមួយ ត្រូវបានផ្តល់ជូនសម្រាប់ការវិលត្រឡប់របស់ប្រធានក្រុមអង់គ្លេសនោះទេ ប៉ុន្តែឥឡូវនេះ Spurs បានឱ្យដឹងថា អ្នកឯកទេស បានណែនាំឱ្យធ្វើការវះកាត់ ហើយគាត់អាចនឹងត្រលប់ទៅហ្វឹកហាត់វិញនៅខែមេសា ពោលគឺ ពីរខែ មុនពេលអឺរ៉ូ ២០២០ ចាប់ផ្តើម។

សេចក្តីថ្លែងការណ៍របស់ Spurs បាននិយាយថា៖ «  បន្ទាប់ពីការវាយតម្លៃលើរបួសជាបន្តបន្ទាប់របស់បុគ្គលិកពេទ្យរបស់យើងកាលពីសប្តាហ៍មុន យើងអាចបញ្ជាក់បានថា Harry Kane នឹងត្រូវធ្វើការវះកាត់ដើម្បីព្យាបាលសរសៃពួរ ដែលដាច់នៅជើងខាងឆ្វេងរបស់គាត់»។

Kane នឹងខកខានការប្រកួត Champions League វគ្គ ១៦ ក្រុមចុងក្រោយទល់នឹង RB Leipzig  ក៏ដូចជាការប្រកួតលីហ្គ ខណៈ Spurs ឈរនៅលេខ ៦ ក្នុងតារាង Premier League ខ្វះ ៦ ពិន្ទុតាមពីក្រោយក្រុមលេខ ៤ Chelsea ៕