រូបសំណាក កម្ពស់ ១៨២ម៉ែត្រ ដែលខ្ពស់ជាងលើពិភពលោក នឹងត្រូវសម្ពោធនៅចុងខែតុលា នាភាគខាងលិចប្រទេសឥណ្ឌា

ឥណ្ឌា៖ ទីបំផុតរូបសំណាកដែលខ្ពស់ជាងគេលើពិភពលោក នឹងត្រូវដាក់បង្ហាញ នៅរដ្ឋហ្គូចារ៉ាត ភាគខាងលិចប្រទេសឥណ្ឌា នារសៀលថ្ងៃទី ១០ ខែកញ្ញានេះ និងដែលតាមការគ្រោងទុកនឹងមានការចូលរួមពីនាយករដ្ឋមន្រ្តីឥណ្ឌា លោក Narendra Modi ។ រូបសំណាកតំណាងឱ្យការឯកភាពជាតិ ត្រូវបានកសាងឡើង ដែលមានកម្ពស់រហូតដល់ ១៨២ម៉ែត្រ ដើម្បីរំលឹកដល់រដ្ឋមន្ត្រីមហាផ្ទៃឥណ្ឌាដំបូងគេ គឺលោក Sardar Vallabhbhai Patel ។

បើតាមប្រវត្តិ លោក Sardar Vallabhbhai Patel គឺជាមេដឹកនាំគណបក្សសមាជជាតិឥណ្ឌា និងជាឧបនាយករដ្ឋមន្ត្រីរបស់នាយករដ្ឋមន្ត្រីឥណ្ឌាដំបូងគេ គឺលោក ចាវ៉ាហាឡាល ណេរូ (Jawaharlal Nehru) ក្រោយពេលដែលប្រទេសឥណ្ឌា ទទួលបានឯករាជ្យពីអង់គ្លេសកាលពីឆ្នាំ១៩៤៧ ។ លោក ក៏ជារដ្ឋមន្ត្រីមហាផ្ទៃឥណ្ឌាដំបូងគេបំផុតផងដែរ ដែលបានបម្រើប្រទេសជាតិ ប្រកបដោយស្នាដៃគួរឲ្យកោតស្ញប់ស្ញែងបំផុត ។

សម្រាប់ថ្ងៃបើកសម្ពោធរូបសំណាងដ៏ខ្ពស់ជាងគេបំផុតនេះ គឺ នៅត្រូវធ្វើនៅថ្ងៃទី៣១ ខែតុលាខាងមុខនេះ ដែលត្រូវជាខួបកំណើតទី ១៤៣ឆ្នាំ នៃលោក Patel ផងដែរ។ ដី ថ្ម ដែក និងទឹក ដែលត្រូវបានប្រើប្រាស់ សម្រាប់កសាងរូបសំណាងដ៏ធំនេះ គឺត្រូវបានប្រមូលយកពីគ្រប់ទិសទីនៅទូទាំងប្រទេសឥណ្ឌាតែម្តង ដើម្បីបង្ហាញពីការរួបរួមគ្នានៃជាតិសាសន៍ឥណ្ឌាតែមួយ និងតម្លៃមិនអាចកាត់ថ្លៃបាននៃរូបសំណាក។

គួរបញ្ជាក់ថា រូបសំណាក តំណាងការឯកភាពជាតិដែលមានកម្ពស់ ១៨២ម៉ែត្រ គិតពីដីឡើងទៅ និង ២៤ម៉ែត្រ គិតពីច្រាំងទន្លេណាម៉ាដា (Narmada) ត្រូវបានប្រកាសសាងសង់ដោយលោក Modi កាលពីឆ្នាំ២០១៣ នៅពេលដែលលោកនៅជារដ្ឋមន្ត្រីនៅក្នុងរដ្ឋ Gujarat ។ រូបសំណាក នេះ ត្រូវបញ្ចប់ការសាងសង់រួចរាល់ហើយ កាលពីពេលថ្មីៗនេះ ៕