ម៉ុងហ្គោលី បិទព្រំដែនឆ្លងទៅមក និងសាលារៀនទូទាំងប្រទេស ដល់ថ្ងៃទី២មីនា ដើម្បីទប់ស្កាត់វីរុសចិន

បរទេស៖ រដ្ឋាភិបាលប្រទេសម៉ុងហ្គោលី នៅថ្ងៃចន្ទ ទី២៧ ខែមករា ឆ្នាំ២០២០ បានប្រកាសបិទព្រំដែនគោក សម្រាប់យានយន្ត និងថ្មើរជើង ឆ្លងកាត់ ព្រមទាំងគ្រឹះស្ថានអប់រំទាំងឡាយ ចាប់ពីថ្ងៃជូនដំណឹងរហូតដល់ថ្ងៃទី២ ខែមីនា ឆ្នាំ២០២០ ដើម្បីជាវិធានការទប់ស្កាត់ការឆ្លងរីករាលដាលនៃជំងឺផ្លូវដង្ហើម បង្កដោយវីរុសកូរ៉ូណា។

ការប្រកាសនេះ បន្ទាប់ពីមានការប្រជុំគណៈរដ្ឋមន្ត្រីមួយនៅថ្ងៃដដែល ស្របពេលម៉ុងហ្គោលី មិនទាន់រកឃើញករណីអ្នកផ្ទុកជំងឺផ្លូវដង្ហើម ដែលបានផ្ទុះឡើងនៅទីក្រុងវូហាន ភាគកណ្ដាលប្រទេសចិន នោះទេ។

ជាមួយគ្នានេះ រដ្ឋាភិបាលម៉ុងហ្គោលី បានណែនាំមិនឱ្យមានការប្រមូលផ្ដុំនៅទីសាធារណៈឡើយ។

សូមជម្រាបថា គិតថ្ងៃទី២៧ ខែមករា ឆ្នាំ២០២០ ជំងឺផ្លូវដង្ហើម បានសម្លាប់មនុស្ស៨១នាក់ និងឆ្លង ២៨០០នាក់។ អ្នកស្លាប់ ៩៥% ស្ថិតនៅខេត្តហ៊ូប៉ី៕

ប្រភព៖ Reuters

ប្រែសម្រួល៖ ចាន់ សោភ័ណ្ឌលាភ