កម្ពុជា ត្រូវការពេលជិត ៧ឆ្នាំទៀត ទើបអាចធ្វើការផ្គត់ផ្គង់សេវាទឹកស្អាតជូនដល់ប្រជាពលរដ្ឋនៅទូទាំងប្រទេស

ភ្នំពេញ៖ រដ្ឋមន្ត្រីក្រសួងអភិវឌ្ឍន៍ជនបទ ឯកឧត្តម បណ្ឌិត អ៊ុក រ៉ាប៊ុន បានថ្លៃងថា ប្រជាពលរដ្ឋកម្ពុជានៅជនបទទូទាំងប្រទេស នឹងទទួលបានទឹកស្អាតប្រើប្រាស់ និង ការលើកកម្ពស់បញ្ហាសុខភាព-អនាម័យ កាន់តែប្រសើររហូតដល់ ៩០ភាគរយនៅឆ្នាំ២០២៣ខាងមុខ មុននឹងការសម្រេចបាន ១០០ភាគរយតាមផែនការ កំណត់ត្រឹមឆ្នាំ២០២៥ ។

បើតាម ឯកឧត្តម រដ្ឋមន្ត្រី បានអោយដឹងថា គិតដល់ឆ្នាំ២០១៨នេះ ស្ថានភាពការងារផ្គត់ផ្គង់ទឹកស្អាត និង លើកកម្ពស់សុខភាព-អនាម័យកម្ពុជា សម្រេចបានជាង ៦០ភាគរយហើយ ។ ទន្ទឹមគ្នានេះដែរ ប្រជាពលរដ្ឋកម្ពុជា នៅតាមតំបន់ជនបទ ចាប់ផ្តើមយល់ដឹងពីបញ្ហា ទឹកស្អាត អនាម័យ និង បានចូលរួមចំណែកកាត់បន្ថយភាពក្រីក្រជាមួយនឹងរាជរដ្ឋាភិបាល បានច្រើន ជាងមុន ។

ឯកឧត្តម រដ្ឋមន្ត្រី បានបញ្ជាក់ថា ដើម្បីឱ្យប្រជាពលរដ្ឋ ទទួលបានទឹកស្អាត និង រស់នៅមានអនាម័យល្អប្រសើររហូតដល់ ៩០ភាគរយ នៅឆ្នាំ២០២៣ ក្រសួងអភិវឌ្ឍន៍ជនបទ មានផែនការសកម្មភាពថ្នាក់ជាតិ និង ថ្នាក់ខេត្តស្តីពីការផ្គត់ផ្គង់ ទឹកស្អាតនិងការលើកកម្ពស់អនាម័យនៅជនបទឆ្នាំ២០១៩ – ២០២៣ ។ ដើម្បីអោយការអនុវត្តផែនការនេះ មានប្រសិទ្ធភាព ឯកឧត្តម ស្នើរ អោយមានការចូលរួមពីបណ្តាដៃគូអភិវឌ្ឍន៍នានា និងអង្គការក្រៅរដ្ឋាភិបាលនានា ។

សូមជម្រាបថា នៅឆ្នាំ២០២៥ ខាងមុខ រាជរដ្ឋាភិបាលកម្ពុជា ប្តេជ្ញាអោយប្រជាពលរដ្ឋកម្ពុជាទូទាំងប្រទេស ទទួលបានទឹកស្អាតប្រើប្រាស់ និង រស់នៅដោយមានអនាម័យ ១០០ភាគរយ៕