Connect with us

ដោយខ្វះឯកសណ្ឋានពេទ្យ ជប៉ុនសំណូមពរឱ្យមានការបរិច្ចាគអាវភ្លៀងសម្រាប់ការពារកូវីដ១៩ ជំនួសវិញ

ជប៉ុន៖ ទីក្រុងអូសាកា នៃប្រទេសជប៉ុន បានស្នើឱ្យប្រជាពលរដ្ឋ បរិច្ចាគអាវភ្លៀងសម្រាប់ក្រុមគ្រូពេទ្យ ដែលកំពុងជួយដល់អ្នកជំងឺកូវីដ១៩ និងកំពុងខ្វះឯកសណ្ឋានការពារ ស្របពេលដែលគ្រូពេទ្យមួយចំនួន បានពាក់ថង់ប្លាស្ទិក ដែលគេប្រើសម្រាប់ដាក់សំរាម។

ទីក្រុងអូសាកា ជាទីក្រុងទី២ បន្ទាប់ពីទីក្រុងតូក្យូ ដែលមានចំនួនអ្នកឆ្លងវីរុសកូវីដ១៩ ច្រើនជាងគេនៅជប៉ុន ដោយមានចំនួនប្រហែល ៩០០ករណី គិតត្រឹមថ្ងៃពុធ ទី១៥ ខែមេសា ឆ្នាំ២០២០នេះ។ មន្ទីរពេទ្យនៅក្រុងមួយនេះ បានសម្រេចចិត្តក្នុងការទទួលនូវការបរិច្ចាគជាអាវភ្លៀង សម្រាប់ក្រុមគ្រូពេទ្យ។

លោករដ្ឋមន្ត្រីសុខាភិបាលជប៉ុន Katsunobu Kato បានដឹកនាំកិច្ចប្រជុំមួយជាមួយថ្នាក់ដឹកនាំវិស័យឧស្សាហកម្ម ដោយជំរុញពួកគេ ឱ្យបង្កើនការផលិតម៉ាស និងសម្ភារបរិក្ខារពេទ្យផ្សេងៗ សម្រាប់ផ្គត់ផ្គង់ក្នុងស្រុក។ ចំណែក លោករាជរដ្ឋាភិបាលជប៉ុន បានដាក់ចេញវិធានការចែកម៉ាសធ្វើពីក្រណាត់ ដែលអាចប្រើប្រាស់ឡើងវិញ ចំនួន២ម៉ាស សម្រាប់ផ្ទះនីមួយៗ។

គួររំឭកថា កាលពីសប្ដាហ៍មុន ជប៉ុនបានប្រកាសអាសន្ន ដោយសារវិបត្តិកូវីដ១៩ ខណៈតួលេខបច្ចុប្បន្ននៃអ្នកឆ្លងសរុប បានកើនដល់ប្រហែល ៨២០០នាក់ និងស្លាប់ ១៦៦នាក់៕

ប្រភព៖ Reuters

ប្រែសម្រួល៖ ចាន់ សោភ័ណ្ឌលាភ

Loading...

ពេញនិយម