កាកបាទក្រហមកម្ពុជាខេត្តព្រះសីហនុ ថ្លែងអំណរគុណអ្នកឧកញ៉ា គិត ម៉េង និង លោកជំទាវ ម៉ៅ ចំណាន ឧបត្ថម្ភថវិកា ២៥០០០ដុល្លារ

ភ្នំពេញ៖ គណៈកម្មាធិការសាខាកាកបាទក្រហមកម្ពុជាខេត្តព្រះសីហនុ បានផ្ញើលិខិតថ្លែងអំណរគុណយ៉ាងជ្រាលជ្រៅចំពោះអ្នកឧកញ៉ា គិត ម៉េង អគ្គនាយកក្រុមហ៊ុន Royal Group និង លោក ជំទាវ ម៉ៅ ចំណាន ដែលបានឧបត្ថម្ភថវិកាចំនួន ២៥០០០ដុល្លារ (ពីរម៉ឺន ៥ពាន់ដុល្លារអាមេរិក) ដើម្បីចូលរួមអបអរសាទរខួបទី១៥៧ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ឆ្នាំ២០២០ ក្រោមប្រធានបទ «ខ្ញុំ ស្រឡាញ់សន្តិភាព និងកាកបាទក្រហមកម្ពុជា»។

ក្នុងលិខិត ក៏បានបញ្ជាក់ថា កាកបាទក្រហមកម្ពុជាខេត្តព្រះសីហនុ នឹងយកចិត្តទុកដាក់ប្រើប្រាស់អំណោយដ៏សប្បុរសនេះ ដើម្បីបម្រើសកម្មភាពមនុស្សធម៌ ជូនប្រជាពលរដ្ឋដែលជួបការលំបាកដោយគ្រោះធម្មជាតិ និងគ្រោះមហន្តរាយផ្សេងៗ។

សូមបញ្ជាក់ថា ក្រៅពីកាកបាទក្រហមខេត្តព្រះសីហនុ អ្នកឧកញ៉ា គិត ម៉េង និងលោកជំទាវ ម៉ៅចំណាន ក៏បានឧបត្ថម្ភថវិកាដល់កាកបាទក្រហមកម្ពុជា, សាខាកាកបាទក្រហមកម្ពុជាខេត្តស្ទឹងត្រែង និងសាខាកាកបាទក្រហមកម្ពុជាខេត្តស្វាយរៀងផងដែរ ដើម្បីចូលរួមអបអរសាទរខួបទី១៥៧ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ឆ្នាំ២០២០ និងដើម្បីគាំទ្រសកម្មភាពមនុស្សធម៌ ដឹកនាំដោយសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា៕