ខ្សែបម្រើ Callum Hudson-Odoi រួចផុតការចោទប្រកាន់ករណីរំលោភសេពសន្ថវៈ

Premier League៖ ខ្សែបម្រើ Callum Hudson-Odoi របស់ក្លិប Chelsea នឹងមិនត្រូវចោទប្រកាន់ពីបទរំលោភសេពសន្ថវៈតទៅទៀតទេ។

កីឡាករវ័យ១៩ឆ្នាំ ត្រូវបានចាប់ខ្លួនកាលពីថ្ងៃទី១៧ ខែឧសភា ក្នុងផ្ទះរបស់គេនាតំបន់ Metropolitan ដោយសង្ស័យថា គេបានបង្កជម្លោះហិង្សាលើនារីម្នាក់ដែលជាតារាម៉ូដែល អំឡុងពេលជាប់បម្រាមនៅក្នុងផ្ទះដោយសារកូវីដ១៩។ ទោះយ៉ាងណា រូបគេត្រូវបានដោះលែងឱ្យនៅក្រៅឃុំវិញ។

និយាយឱ្យដឹងតាមរយៈបណ្តាញសង្គម Twitter, Hudson-Odoi បានឱ្យដឹងថា៖ “ខ្ញុំបានរក្សាភាពស្ងៀមស្ងាត់ និងសហការជាមួយប៉ូលីសយ៉ាងពេញទំហឹងនៅក្នុងការស៊ើបអង្កេតរបស់ពួកគេ ព្រោះខ្ញុំដឹងថាថ្ងៃមួយភាពស្អាតស្អំរបស់ខ្ញុំនឹងត្រូវបានបង្ហាញ។ បន្ទាប់ពីការស៊ើបអង្កេតពេញលេញ និងហ្មត់ចត់ ឥឡូវនេះប៉ូលីស បានបញ្ជាក់ថា ពួកគេនឹងមិនចោទប្រកាន់អ្វីទៀតទេ”។

ដោយឡែក ក្លិប Chelsea វិញ មិនទាន់បញ្ចេញសេចក្តីថ្លែងការណ៍ណាមួយឡើយលើករណីនេះ។
Callum Hudson-Odoi គឺជាកីឡាករអង់គ្លេសម្នាក់ ដែលធ្លាប់ឆ្លងជំងឺកូវីដ១៩ មុនពេលលីគបាល់ទាត់អង់គ្លេស ត្រូវប្រកាសផ្អាកជាផ្លូវការ កាលពីខែមីនា។ ប៉ុន្តែក្រោយមក គេក៏បានជាសះស្បើយ ហើយត្រូវនៅតែក្នុងផ្ទះ ដើម្បីការពារសុវត្ថិភាពសុខភាព៕