១ ក្រុម ១៦ នាក់ បានឆ្លងវីរុសកូវីដ១៩ ទាំងអស់ ក្រោយទៅកម្សាន្តនៅបារមួយក្នុងរដ្ឋ Florida

អាមេរិក៖ គ្រាន់តែកន្លែងកម្សាន្ត ត្រូវបានអនុញ្ញាតឱ្យបើកឡើងវិញភ្លាម មនុស្សម្នានាំគ្នាទៅកម្សាន្តនៅបារមួយកន្លែងក្នុងរដ្ឋផ្លរីដា ក្នុងនោះដែរសមាជិក ១ ក្រុមមានគ្នា ១៦ នាក់ បានប្រាប់ថា ពួកគេបានធ្វើតេស្តឃើញវិជ្ជមានជំងឺកូវីដ១៩ ទាំងអស់ ក្រោយទៅកម្សាន្តនៅទីនោះរួច។

សមាជិកទាំង ១៦ នាក់បានបញ្ជាក់ថា ពួកគេនាំគ្នាទៅកម្សាន្តនៅទីនោះ ដើម្បីជប់លៀងពិធីខួបកំណើតមិត្តភ័ក្តិ។ ត្បិតមនុស្សកកកុញក៏ពិតមែន ប៉ុន្តែមិនមាននាក់ពាក់ម៉ាសការពារឡើយ ទីបំផុតម្នាក់ៗត្រូវបានឆ្លងវីរុសកូវីដទាំងអស់គ្នា ដែលវាពិតជាឆាប់រហ័សស្ទើរមិនអាចទទួលយកបាន។

សមាជិកក្រុម ៣ នាក់ បានរំឭកដល់ទាំងអស់គ្នាជាសាធារណៈ កុំឱ្យមានការធ្វេសប្រហែស ដោយសារវីរុសដ៏កាចសាហាវមួយនេះនៅបន្តរាតត្បាតមិនទាន់ចប់នៅឡើយ។ ហើយក៏អំពាវនាវឱ្យមានការប្រុងប្រយ័ត្នឱ្យបានខ្ពស់ បើទោះបីជាការរឹតបន្តឹងត្រូវបានបន្ធូរបន្ថយក៏ដោយ៕

(ទស្សនាវីដេអូ)

ប្រភព៖ CNN

ប្រែសម្រួល៖ គង់ ចាន់ស្រីនុច