នាយកប្រតិបត្តិ Airbnb៖ ពួកយើងចំណាយពេល ១២ឆ្នាំដើម្បីកសាងវាឡើង ប៉ុន្តែវាស្ទើរបាត់បង់ទាំងស្រុងត្រឹមរយៈពេល ៦ សប្តាហ៍

អាមេរិក៖ ចង់សម្រេចនូវការងារ ឬ មុខជំនួញក្នុងក្តីសុបិនរបស់ខ្លួន គឺត្រូវបណ្តាក់ទុកនូវកម្លាំងកាយ ចិត្ត ពេលវេលាជាច្រើនដើម្បីទៅដល់គោលដៅ។ ជាក់ស្តែង Airbnb ដែលជាក្រុមហ៊ុនទីផ្សារអនឡាញ ជួយរៀបចំការស្នាក់នៅសម្រាប់ភ្ញៀវទេសចរ និងប្រឹក្សាពីបទពិសោធន៍ក្នុងការធ្វើដំណើរកម្សាន្ត ដែលមានទីតាំងនៅក្រុងសេនហ្វ្រានស៊ីស្កូរ រដ្ឋកាលីហ្វ័រញ៉ា បានចំណាយពេល ១២ ឆ្នាំដើម្បីបង្កើតក្រុមហ៊ុននេះឡើង ប៉ុន្តែពេលនេះវាស្ទើរតែបាត់បង់ក្នុងមួយប៉ប្រិចភ្នែក ដោយសារវីរុសកូវីដ១៩។

លោក Brian Chesky បានផ្តល់បទសម្ភាសន៍ថា មុខជំនួញដែលលោកខិតខំសាងឡើងរយៈពេល ១២ ឆ្នាំមកនេះ ស្ទើរតែបាត់បង់ទាំងស្រុងត្រឹមរយៈពេល ៤-៦ សប្តាហ៍ប៉ុណ្ណោះ ដោយសារវិបត្តិនៃការរាតត្បាតវីរុសកូវីដ១៩។ វិស័យទេសចរណ៍ បានបិទគ្រប់ប្រទេស ធ្វើឱ្យសេដ្ឋកិច្ចធ្លាក់ចុះយ៉ាងគំហុករហូតដល់ក្រុមហ៊ុនជាច្រើនបិទទ្វារជាបន្តបន្ទាប់។

គួរបញ្ជាក់ដែរថា សហស្ថាបនិក និងជានាយកប្រតិបត្តិក្រុមហ៊ុន Airbnb វ័យ ៣៨ ឆ្នាំលោក Brain Chesky គឺជាបុគ្គលដែលជោគជ័យលើមុខជំនួញ និងបានក្លាយជាបុគ្គលដែលជះឥទ្ធិពលដល់មនុស្សជាច្រើនទៀតផង៕

ប្រភព៖ Entrepreneur

ប្រែសម្រួល៖ គង់ ចាន់ស្រីនុច