អតីតខ្សែការពារ John Terry នឹងចាប់ផ្តើមអាជីពជាអ្នកចាត់ការទូទៅក្លិបលើកដំបូងនារដូវកាលក្រោយ

អង់គ្លេស៖ អតីតខ្សែការពារ Chelsea លោក John Terry នឹងចាប់ផ្តើមអាជីពជាអ្នកចាត់ការទូទៅក្លិបលើកដំបូងនារដូវកាលបន្ទាប់ ដោយលោកគ្រោងនឹងចាកចេញពីតំណែងជំនួយការគ្រូបង្វឹកក្លិប Aston Villa ទៅដឹកនាំក្លិប Bristol City នាក្របខណ្ឌ Championship។

បុរសវ័យ៣៩ឆ្នាំ កំពុងស្ថិតក្នុងដំណាក់កាលចរចាកិច្ចសន្យាដឹកនាំក្លិបខាងលើ ដែលកំពុងប្រកួតប្រជែងនៅលីគទី២ របស់អង់គ្លេស សម្រាប់រដូវកាល 2020-21។

Bristol City ទើបតែបញ្ចប់តំណែងអ្នកចាត់ការ Lee Johnson កាលពីសប្តាហ៍មុន បន្ទាប់ពីដឹកនាំរយៈពេល៤ឆ្នាំ ពោលគឺតាំងពីឆ្នាំ២០១៦មក ហើយគ្រូជំនួយរបស់ក្លិប លោក Dean Holden កំពុងដឹកនាំក្លិបនេះជាបណ្តោះអាសន្ន។

លោក John Terry បានចាកចេញពី Chelsea មកចូលរួមជាមួយ Aston Villa បានមួយរដូវកាលគឺរដូវកាល 2017-18 មុនសម្រេចចិត្តចូលនិវត្តន៍ និងបន្តអាជីពជាគ្រូជំនួយតែម្តង៕