អ្នកជិះកង់ Chris Froome នឹងចាកចេញពីក្រុម Ineos នៅដំណាច់រដូវកាលនេះ

បរទេស៖ កីឡាករប្រណាំងកង់ Chris Froome នឹងចាកចេញពីក្រុម Ineos ឬដែលពីមុនស្គាល់ថាជាក្រុម Sky នៅដំណាច់រដូវកាលនេះ។

ការចែកផ្លូវគ្នារវាង កីឡាករវ័យ៣៥ឆ្នាំ និងក្រុម Ineos នេះ គឺបន្ទាប់ពីភាគីទាំងសងខាង មិនអាចឈានដល់កិច្ចព្រមព្រៀងបន្តកិច្ចសន្យាថ្មី។ រូបគេនឹងទៅចូលរួម ក្រុម Israel Start-Up Nation របស់អ៊ីស្រាអែល ដោយក្លាយជាប្រធានក្រុមតែមួយគត់។

ទោះយ៉ាងណា Chris Froome នឹងនៅតែចូលរួមប្រកួតឱ្យក្រុម Ineos សម្រាប់រដូវកាលនេះ ដែលនឹងចាប់ផ្តើមឡើងវិញ នៅថ្ងៃទី២៩ ខែសីហា។

Chris Froome បានចូលរួមជាមួយ ក្រុម Ineos ឬ ក្រុម Sky នេះ កាលពីឆ្នាំ២០១០ ដោយបានក្លាយខ្លួនជាកីឡាករប្រណាំងកង់ជោគជ័យជាងគេរបស់អង់គ្លេស គឺបានឈ្នះការប្រកួតពានរង្វាន់ Grand Tours ទាំងអស់ដែលរួមមានពានរង្វាន់ Tour de France ៤សម័យ ពានរង្វាន់ Giro d’Italia ១សម័យ និង ពានរង្វាន់ Vuelta a España ២សម័យផងដែរ៕