ថៃ នឹងអនុញ្ញាតឱ្យពលករក្នុងវិស័យ២ វិលត្រឡប់ទៅធ្វើការវិញ តែដាក់ដោយឡែក១៤ថ្ងៃ

ថៃ៖ គណៈកម្មការគ្រប់គ្រងស្ថានភាពជំងឺកូវីដ១៩ ប្រទេសថៃ បានប្រកាសឱ្យដឹងកាលពីចុងសប្ដាហ៍មុនថា វិធានការថ្មីសម្រាប់ពលករ គឺអនុញ្ញាតឱ្យពលករក្នុងវិស័យសំណង់ និងឧស្សាហកម្មចំណីអាហារ ត្រឡប់ចូលទៅបម្រើការងារវិញ ប៉ុន្តែពួកគេ តម្រូវឱ្យធ្វើចត្តាឡីស័ក១៤ថ្ងៃសិន។

លោក Taweesilp Visanuyothin អ្នកនាំពាក្យ គណៈកម្មការគ្រប់គ្រងស្ថានភាពជំងឺកូវីដ១៩ បានបញ្ជាក់ថ្មីៗនេះថា ពលករដែលនឹងត្រូវអនុញ្ញាតឱ្យវិលត្រឡប់ទៅធ្វើការនៅក្នុងប្រទេសថៃ ត្រូវមានលិខិតស្របច្បាប់បញ្ជាក់ពីការធ្វើដំណើរទៅកាន់ប្រទេសថៃ ហើយនិយោជក ដែលនាំពលករវិលចូលប្រទេសថៃ ដើម្បីបម្រើការងារឱ្យសហគ្រាសរបស់ខ្លួនវិញ ត្រូវចេញមុខធានាលើពលករទាំងនោះ។

អ្នកនាំពាក្យ គណៈកម្មការគ្រប់គ្រងស្ថានភាពជំងឺកូវីដ១៩ បានបន្តថា ពលករដែលវិលត្រឡប់ទៅបម្រើការនៅក្នុងប្រទេសថៃ តម្រូវឱ្យទាញយកដំឡើងកម្មវិធី Tracking Appដើម្បីតាមដានការធ្វើបម្លាស់ទីរបស់ពួកគេ។ បន្ទាប់ពីធ្វើដាក់ដោយឡែក ១៤ថ្ងៃ និយោជក ត្រូវមានមធ្យោបាយដឹកពលករពីមណ្ឌលចត្តាឡីស័កទៅកាន់ទីកន្លែងធ្វើការដោយខ្លួនឯង។

ក្រសួងការងារថៃ បានព្រមាននិយោជក មិនត្រូវប្រើប្រាស់មេខ្យល់ ដើម្បីឱ្យនាំពលករចូលប្រទេសដោយខុសច្បាប់ឡើយ ដោយបារម្ភពីការដែលអាចចម្លងជំងឺកូវីដ១៩បន្ថែមទៀត៕

ប្រភព៖ Bangkok Post

ប្រែសម្រួល៖ លាភ