ក្រុងព្រះសីហនុ និងអូស្ត្រាលី គ្រោងបង្កើតកម្មវិធីឆ្លាតវៃសម្រាប់តាមដានការប្រើទឹកភ្លើង កន្លែងចតរថយន្ត…

ព្រះសីហនុ៖ “ផែនការយុទ្ធសាស្ត្រទីក្រុងឆ្លាតវៃ” សម្រាប់ខេត្តព្រះសីហនុ គាំទ្រដោយប្រទេសអូស្ត្រាលី គ្រោងនឹងបង្កើតកម្មវិធីសេវាកម្មសំខាន់ៗ ដូចជា ការកត់ត្រាតាមដានការប្រើប្រាស់ទឹកភ្លើង ការកំណត់កន្លែងថតរថយន្ត និងការគ្រប់គ្រងចរាចរណ៍ ឱ្យកាន់តែប្រសើរឡើង ដើម្បីជួយក្រុងព្រះសីហនុសម្រេចបាននូវចក្ខុវិស័យទីក្រុងឆ្លាតវៃរបស់ខ្លួន។

ផែនការយុទ្ធសាស្ត្រទីក្រុងឆ្លាតវៃ បានប្រកាសឱ្យដឹងនៅក្នុងជំនួបរវាងលោក គួច ចំរើន អភិបាលខេត្តព្រះសីហនុ និងលោក Pablo Kang ឯកអគ្គរដ្ឋទូតអូស្ត្រាលីប្រចាំកម្ពុជា កាលពីថ្ងៃទី០៦ ខែសីហា ឆ្នាំ២០២០។ ផែនការយុទ្ធសាស្ត្រទីក្រុងឆ្លាតវៃនេះ ត្រូវបានឧបត្ថម្ភថវិកាដោយ កម្មវិធីវិនិយោគក្នុងវិស័យហេដ្ឋារចនាសម្ព័ន្ធ (3i) របស់អូស្ត្រាលី នៅកម្ពុជា។

ខេត្តព្រះសីហនុ បានឆ្លងកាត់ការអភិវឌ្ឍយ៉ាងលឿនក្នុងប៉ុន្មានឆ្នាំចុងក្រោយនេះ ដែលនាំឱ្យមានគម្រោងហេដ្ឋារចនាសម្ព័ន្ធថ្មីៗជាច្រើននៅក្នុងទីក្រុង។

លោកអភិបាលខេត្តព្រះសីហនុ គួច ចំរើន បានមានប្រសាសន៍ក្នុងជំនួបនេះថា រដ្ឋាភិបាលខេត្តព្រះសីហនុ អរគុណដល់ការគាំទ្ររបស់អូស្ត្រាលី និងរំពឹងចាំមើលសេចក្ដីពង្រាងផែនការយុទ្ធសាស្ត្រក្រុងឆ្លាតវៃ នៅចុងឆ្នាំ២០២០នេះ៕

អត្ថបទ៖ លាភ