កម្ពុជា ផ្អាកជើងហោះហើរមកពីប្រទេសហ្វីលីពីនមួយរយៈ ចាប់ពីថ្ងៃទី១៣ខែសីហាតទៅ

ភ្នំពេញ៖ ក្រសួងសុខាភិបាលកម្ពុជា បានចេញប្រកាសសម្រេចផ្អាកជើងយន្តហោះពីប្រទេសហ្វីលីពីន ដោយអនុវត្តចាប់ពីថ្ងៃទី១៣ ខែសីហា ឆ្នាំ២០២០ តទៅ បន្ទាប់ពីមានករណីនាំចូលកូវីដ១៩ ជាបន្តបន្ទាប់តាមរយៈជើងយន្តហោះមកកាន់ប្រទេសកម្ពុជា។

ការប្រកាសផ្អាកនេះ ធ្វើឡើងបន្ទាប់ពីមានចំណារយល់ព្រម ដោយសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា កាលពីថ្ងៃទី១១ ខែសីហា ឆ្នាំ២០២០។

ក្រសួងសុខាភិបាលបានឱ្យដឹងថា កាលពីប៉ុន្មានថ្ងៃចុងក្រោយនេះ ប្រទេសហ្វីលីពីន មានអត្រាឆ្លងកូវីដ១៩ ហក់ឡើងយ៉ាងគំហុក ដែលធ្វើឱ្យអត្រាអ្នកផ្ទុកវីរុសកូវីដ១៩ ខ្ពស់ជាងគេនៅក្នុងបណ្ដាប្រទេសសមាជិកអាស៊ាន។ ម្យ៉ាងទៀត កាលពីថ្ងៃទី០៨ ខែសីហា ជើងហោះហើរពីប្រទេសហ្វីលីពីនមួយ ដែលមានអ្នកដំណើរសរុបចំនួន ១១៩នាក់ ត្រូវបានធ្វើតេស្តរកឃើញមានអ្នកវិជ្ជមានវីរុសកូវីដ១៩ រហូតដល់ ១៣នាក់។

សូមជម្រាបថា រាជរដ្ឋាភិបាលកម្ពុជា ទើបតែផ្អាកជាបណ្ដោះអាសន្ននូវជើងហោះហើរពីប្រទេសម៉ាឡេស៊ី និងឥណ្ឌូណេស៊ី ដែលបានចូលជាធរមានកាលពីថ្ងៃទី០១ ខែសីហា ឆ្នាំ២០២០កន្លងទៅផងដែរ៕