មកទស្សនាទិដ្ឋភាពទូទៅសម្រាប់ការតុបតែងលម្អ នៅសៀមរាប ត្រៀមទទួលភ្ញៀវនៅថ្ងៃឈប់សម្រាកខាងមុខ

សៀមរាប៖ រដ្ឋបាលខេត្តសៀមរាប ដោយមានការសហការជាមួយសហភាពសហព័ន្ធយុវជនកម្ពុជា និងសាខាកាកបាទក្រហមកម្ពុជា បាននិងកំពុងរៀបចំតុបតែងលម្អស្ទឹងសៀមរាប ដើមី្បធ្វើឱ្យមានសោភ័ណភាពកាន់តែស្រស់ត្រកាល ក្នុងការទទួលស្វាគមន៍ភ្ញៀវទេសចរជាតិ និងអន្តរជាតិ ក្នុងឱកាសថ្ងៃឈប់សម្រាកសងចូលឆ្នាំខ្មែរ នៅថ្ងៃទី១៧-២១ ខែសីហា ឆ្នាំ២០២០ ខាងមុខនេះ តាមបណ្តោយស្ទឹងសៀមរាប ចាប់ពីអតីតស្ពានមន្ទីរទេសចរណ៍ចាស់ រហូតដល់ស្ពានវត្តដំណាក់។  

ការរៀបចំលម្អស្ទឹងសៀមរាបនេះ គឺរំលេចនូវសោភ័ណភាពសម្រស់បៃតងនៅតាមដងស្ទឹង និង រុក្ខវិថីនានាក្នុងក្រុង នាពេលរាត្រីឱ្យកាន់តែមានការទាក់ទាញអារម្មណ៍ភ្ញៀវទេសចរជាតិ និងអន្តរជាតិ ដែលចូលមកទស្សនាកម្សាន្ត។ ជាមួយគ្នានេះ រដ្ឋបាលខេត្តសៀមរាប ក៏បានត្រៀមរៀបចំកម្មវិធីមួយចំនួន រួមមាន៖

១- កម្មវិធីសាសនា បួងសួងសុំសេចក្តីសុខ

២- កម្មវិធីពិព័រណ៍ បន្លែផ្លែឈើ កសិផល ផលិតផល ក្រុង-ស្រុកទាំង១២

៣- កម្មវិធីប្រកួតម្ហូបអាហារ ពានរង្វាន់មាន់អាំង ឆ្ងាញ់ជាងគេនៅខេត្តសៀមរាប

៤- ផ្សារទឹក

៥- ផាប់ស្ទ្រីត

៦- កម្មវិធីជិះកង់

៧- កម្មវិធីកីឡាវាយកូនហ្គោល

៨- កម្មវិធីដើរព្រៃ ចង្ក្រានរយ ភ្នំគូលែន

៩- ផ្ទាំងទស្សនីយភាពសិល្បៈ

ជាការកត់សម្គាល់ នៅឯភូមិព្រះដាក់ ឃុំព្រះដាក់ ស្រុកបន្ទាយស្រី ក៏មានការរៀបចំតុបតែងគួរឱ្យទាក់ទាញមួយផ្នែកផងដែរ សម្រាប់ភ្ញៀវទេសចរជាតិ និងអន្តរជាតិ ក្នុងឱកាសថ្ងៃឈប់សម្រាកខាងមុខនេះ៕

អត្ថបទ៖ លាភ