រកឃើញករណីជនខិលខួចលួចគណនីរបស់នារីៗ រួចបង្ហោះថាលក់សេវាផ្លូ វភេ ទនៅថៃ

ថៃ៖ យ៉ាងហោចណាស់ គណនីហ្វេសប៊ុករបស់នារីចំនួន ៦០នាក់ ត្រូវបានជនខិលខួច លួចលេខសម្ងាត់ ដើម្បីចូលទៅបង្ហោះចែកចាយរូបថតរបស់ម្ចាស់គណនី ថា ជាអ្នកផ្ដល់សេវាផ្លូវភេទ។ ហេតុការណ៍នេះ បានកើតឡើងនៅភាគខាងត្បូងប្រទេសថៃ។

ករណីនេះ ត្រូវបានដឹងបន្ទាប់ពីស្ត្រី២រូប ដែលជាជនរងគ្រោះ បានរាយការណ៍ទៅសមត្ថកិច្ច នៅស្រុកឆៃបូរី ខេត្តស៊ូរ៉ាត់ថានី កាលពីពេលថ្មីៗនេះ។ រូបថតរបស់ជនរងគ្រោះដែលមានអាយុចន្លោះពី ១៨-៤០ ឆ្នាំ ត្រូវបានជនសង្ស័យបង្ហោះក្នុងគ្រុបបណ្ដាញសង្គមហ្វេសប៊ុក សម្រាប់អ្នកស្វែងរកសេវាម៉ាស្សាបូករួមទាំងសេវាផ្លូវភេទ។

នារីម្នាក់ដែលជាជនរងគ្រោះ បានអះអាងថា មានអ្នកឆាតមកសួរទាក់ទងនឹងការផ្ដល់សេវាផ្លូវភេទ ហើយបានឱ្យនាង ផ្ញើរូបថតដែលបង្ហាញពីតំបន់ឯកជនទៅកាន់ពួកគេ។ អ្នកខ្លះ ក៏បានណាត់ជួបនាងថែមទៀតផង។

សូមជម្រាបថា ចំពោះករណីនេះ ជនសង្ស័យម្នាក់ ដែលត្រូវបានសមត្ថកិច្ចថៃ កំណត់អត្តសញ្ញាណបាន នឹងត្រូវចាប់មកដាក់ទោសតាមច្បាប់៕

ប្រភព៖ Bangkok Post

ប្រែសម្រួល៖ លាភ