សិស្សសាលាឯកជន សូមត្រៀមខ្លួនសម្រាប់ការចូលរៀនឡើងវិញ ចាប់ពីថ្ងៃទី០៧ខែកញ្ញា

ភ្នំពេញ៖ សិស្សានុសិស្ស នៃគ្រឹះស្ថានសិក្សាឯកជន នឹងអាចវិលត្រឡប់ចូលសិក្សាតាមថ្នាក់រៀន នៅពេលដែលក្រសួងអប់រំ យុវជន និងកីឡា ចេញលិខិតអនុញ្ញាតឱ្យគ្រឹះស្ថានសិក្សាឯកជនដែលអនុវត្តតាមសេចក្ដីណែនាំនៃការបើកដំណើរការឡើងវិញ បន្ទាប់ពីគ្រឹះស្ថានទាំងនោះ ដាក់ពាក្យស្នើសុំបើកសាលាឡើងវិញក្នុងដំណាក់កាលទី២។

សូមជម្រាបថា ការបើកដំណើរការសាលារៀនក្នុងដំណាក់កាលទី២ អនុវត្តចាប់ពីថ្ងៃទី០៧ ខែកញ្ញា ឆ្នាំ២០២០។

គួររំឭកថា ក្រសួងអប់រំ យុវជន និងកីឡា ក៏ធ្លាប់បានជូនដំណឹងស្ដីពីការបើកដំណើរការគ្រឹះស្ថានសិក្សាសាធារណៈ កម្រិតបឋមសិក្សា និងមធ្យមសិក្សា ព្រមទាំង មតេយ្យសិក្សា ដែលទទួលបានការឯកភាពឱ្យបើកដំណើរការឡើងវិញដោយក្រសួងអប់រំ ក្នុងដំណាក់កាលទី២។

សាលារៀន ដែលអាចបើកដំណើរការឡើងវិញ ត្រូវអនុវត្តប្រកបដោយស្តង់ដា SOP និងតាមការណែនាំរបស់ក្រសួងសុខាភិបាល៕

អត្ថបទ៖ លាភ