កំពុងកាយដីស្រាប់តែលេចចម្លាក់តោបុរាណដ៏ធំមួយ នៅមុខក្រុមប្រឹក្សាអភិវឌ្ឍន៍កម្ពុជា

ភ្នំពេញ៖ កម្លាំងមន្ត្រីជំនាញស៊ីម៉ាក់ សហការជាមួយអាជ្ញាធររាជធានីភ្នំពេញ បានជីកកាយដី ដើម្បីរៀបចំប្រព័ន្ធលូចម្រុះទឹកនៅបរិវេណវត្តភ្នំ ក៏ស្រាប់តែប្រទះឃើញរូបចម្លាក់តោថ្មបុរាណដ៏ធំមួយ។

លោក ហេង រតនា ប្រតិភូរាជរដ្ឋាភិបាល ទទួលបន្ទុកជាអគ្គនាយក មជ្ឈមណ្ឌលសកម្មភាពកម្ចាត់មីនកម្ពុជា (CMAC) បានបញ្ជាក់ពីរបកគំហើញនេះ នៅរសៀលថ្ងៃទី០៤ ខែកញ្ញា ឆ្នាំ២០២០នេះ។

របកគំហើញនេះ បានទទួលការអបអរសាទរយ៉ាងខ្លាំងពីសំណាក់ប្រជាពលរដ្ឋ បន្ទាប់ពីមានការចែកចាយនៅលើបណ្ដាញទំនាក់ទំនងសង្គម៕

លោក ហេង រតនា បានឱ្យដឹងថា៖ “នៅល្ងាចនេះនៅថ្ងៃទី០៤ ខែកញ្ញា ឆ្នាំ២០២០ នេះនៅទីតាំងបោសសម្អាតគ្រាប់ដើម្បីអនុវត្តគម្រោងអភិវឌ្ឍនៃការដ្ឋានសាងសង់អាងស្តុកទឹកក្រោមដី និងសាងសង់ស្ថានីយបូមទឹកទី៦ របស់រាជធានីភ្នំពេញដែលគាំទ្រដោយទីភ្នាក់ងារសហប្រតិបត្តិការអន្តរជាតិជប៉ុន (JICA) (នៅខាងមុខក្រុមប្រឹក្សាអភិវឌ្ឍន៍កម្ពុជាជាប់មាត់ទន្ល) កម្លាំងស៊ីម៉ាក់បានជីកដីប៉ះចំរូបចម្លាក់តោថ្មបុរាណដែលមានកំពស់ជាង២,៥ម៉ែត្រទំហំដងខ្លួនជាង១ម៉ែត្រ! កម្លាំងស៊ីម៉ាក់បានប្រគល់តោថ្មនេះ ជូនទៅសាលារាជធានីភ្នំពេញក្នុងការគ្រប់គ្រងបន្ត! សូមជូនពរសំណាងល្អគ្រប់ៗគ្នា នៅថ្ងៃកាន់បិណ្ឌទី២នេះ!”៕