ថៃ ជំរុញឱ្យជនបរទេសទាំងអស់ ទៅពន្យារទិដ្ឋាការស្នាក់នៅ មុនថ្ងៃ២៦កញ្ញា

ថៃ៖ នាយកដ្ឋានអន្តោប្រវេសន៍នៃប្រទេសថៃ បានជំរុញឱ្យជនបរទេសទាំងអស់ ទៅពន្យារទិដ្ឋាការស្នាក់នៅការិយាល័យអន្តោរប្រវេសន៍ ឱ្យបានរួចរាល់មុនថ្ងៃទី២៦ ខែកញ្ញា ឆ្នាំ២០២០ ដែលត្រូវជាកាលកំណត់នៃការលើកលែងការស្នាក់នៅសម្រាប់ជនបរទេស។

លោក Sompong Chingduang មន្ត្រីនៃនាយកដ្ឋានអន្តោប្រវេសន៍ថៃ បានឱ្យដឹងថា ជនបរទេសទាំងអស់នៅក្នុងប្រទេសថៃ ត្រូវធ្វើការទាក់ទងជាមួយការិយាល័យអន្តោប្រវេសន៍មុន ដើម្បីជៀសវាងការសម្រុកទៅពន្យារពេលទិដ្ឋាការ នៅជិតថ្ងៃបិទទទួលការស្នើពន្យារពេលទិដ្ឋាការ។

ដោយសារវិបត្តិកូវីដ១៩ ប្រទេសថៃ បានអនុញ្ញាតឱ្យជនបរទេសដែលផុតសុពលភាពទិដ្ឋាការ បន្តស្នាក់នៅរហូតដល់ថ្ងៃទី២៦ ខែកញ្ញា។ លោក Sompong Chingduang បានបញ្ជាក់ថា ជនបរទេសដែលកាន់ទិដ្ឋាការរយៈពេលខ្លី ត្រូវចាកចេញពីប្រទេសថៃ នៅត្រឹមថ្ងៃទី២៦ ខែកញ្ញា។

ចំពោះជនបរទេស ដែលមិនមានជើងហោះហើរត្រឡប់ទៅប្រទេសកំណើតរបស់ពួកគេនោះ ត្រូវស្នើសុំលិខិតបញ្ជាក់ពីស្ថានទូត ឬស្ថានកុងស៊ុលនៃប្រទេសរបស់ពួកគេ ដើម្បីយកទៅប្រគល់ជូនការិយាល័យអន្តោប្រវេសន៍ក្នុងមូលដ្ឋានដែលពួកគាត់ស្នាក់នៅ៕

ប្រភព៖ Bangkok Post

ប្រែសម្រួល៖ លាភ