Fulham កំពុងពិភាក្សាការនាំយកអ្នកចាំទី Alphonse Areola ពី PSG

Premier League៖ ក្រុម Fulham ដែលទើបឡើងមក លីគកំពូលអង់គ្លេស កំពុងតែចាប់អារម្មណ៍ចង់បានអ្នកចាំទីរបស់ក្រុម Paris Saint-Germain គឺអ្នកចាំទី Alphonse Areola ក្នុងលក្ខខណ្ឌខ្ចីជើង មួយរដូវកាល។

Areola បានចំណាយពេល១រដូវកាលនៅ Real Madrid កាលពីរដូវកាលមុនដែលជាផ្នែកមួយនៃកិច្ចព្រមព្រៀងដែលបានយក Keylor Navas ទៅកីឡដ្ឋាន Parc des Princes ប៉ុន្តែរដូវកាលថ្មី នេះគេបានវិលត្រឡប់មកកាន់ប្រទេសបារាំងវិញ។

សេចក្តីថ្លែងការណ៍មួយនៅលើគេហទំព័រ Real Madrid កាលពីខែមុនបាននិយាយថា ក្លិបសូមថ្លែងអំណរគុណដល់ Areola ចំពោះការខិតខំប្រឹងប្រែងក្នុងការនៅជាមួយក្លិបហើយ នៅរដូវកាលនេះជូនពរឱ្យគេមានសំណាងល្អនៅរដូវកាលថ្មី។

Areola បានបង្ហាញខ្លួនចំនួន ៩ ដងសម្រាប់ Real Madrid រដូវកាលមុន ប៉ុន្តែក្លិបនៅតែដាក់ឱ្យ Thibaut Courtois ជាជម្រើសដំបូងរបស់ក្លិប។

សូមបញ្ចាក់ផងដែរថា ក្រោយពីក្រុម Fulham វិលទៅកាន់ក្របខណ្ឌ Premier League វិញនេះ ក្លិបក៏បាននាំយកខ្សែប្រយុទ្ធ Mario Lemina ក្នុងលក្ខណខ្ចីជើងពី Southampton និងកីឡាករ Harrison Reed មកកាន់កីឡាដ្ឋាន Craven Cottage ផងដែរ៕