Chelsea សម្រេចកិច្ចព្រមព្រៀងផ្ទេរអ្នកចាំទី Edouard Mendy ពីក្លិប Rennes

តាមការផ្សព្វផ្សាយពីសារពត៌មាន Dailymail ឱ្យដឹងថា ក្លិប Chelsea បានសម្រេចកិច្ចព្រមព្រៀង ដើម្បីផ្ទេរអ្នកចាំទី Edouard Mendy ពីក្លិបបារាំង Rennes តម្លៃ២៥លានផោន។

កីឡាករសញ្ជាតិសេណេហ្គាល់ វ័យ២៨ឆ្នាំ នឹងក្លាយជាកីឡាករទី៧ដែលក្លិបតោខៀវចុះកិច្ចព្រមព្រៀងផ្ទេរនៅរដូវក្តៅនេះ។ នៅពេលមានការសម្រេចជាចុងក្រោយ គេនឹងចូលរួមប្រកួតប្រជែង តំណែងអ្នកចាំទីជម្រើសដំបូងជាមួយ Kepa Arrizabalaga និង Willy Caballero។

Mendy ត្រូវបាន Rennes ដកចេញពីការហ្វឹកហាត់ បន្ទាប់ពីពួកគេទទួលយកសំណើរបស់ Chelsea ហើយបានធ្វើការចរចាជាមួយភ្នាក់ងាររបស់កីឡាករនិងប្រធានក្លិប Rennes លោក Nicolas Holveck មុនពេលធ្វើដំណើរទៅទីក្រុងឡុងដ៍ ដើម្បីពិនិត្យសុខភាព។

តម្លៃផ្ទេរអ្នកចាំទីខ្ពស់បំផុតដែលផ្ទេរពីបារាំងមកអង់គ្លេសកន្លងមកគឺ Chelsea បានចំណាយ១២,៣លានផោនទៅឱ្យ Rennes កាលពីឆ្នាំ២០០៤ ដើម្បីនាំយកអ្នកចាំទី Petr Cech ដែល ឥឡូវលោកគឺជាប្រធានបច្ចេកទេសនៅ Chelsea និងបានដើរតួនាទីសំខាន់ក្នុងការជ្រើសរើស Edouard Mendy នេះ៕