វត្តពុទ្ធគិរី និងអន្លង់ភ្ញៀវនៅជិតគ្នាបង្កើយ សក្តិសមសម្រាប់រដូវកាលបុណ្យភ្ជុំណាស់ បានទាំងធ្វើបុណ្យ បានទាំងដើរកម្សាន្ត

តាកែវ៖ ស្ថិតក្នុងភូមិស្រែជើងរាស្ត្រ ឃុំត្រពាំងក្រញូង ស្រុកត្រាំកក់ ខេត្តតាកែវ រមណីយដ្ឋានកែច្នៃ អន្លង់ភ្ញៀវ ឬ កំពូលពេជ្រដែលបងប្អូនខ្មែរយើងធ្លាប់បានស្គាល់មកហើយបានកំពុងអភិវឌ្ឍខ្លួនឱ្យកាន់តែមានភាពទាក់ទាញខ្លាំងឡើងនៅលើផ្ទៃដីជាច្រើនហិកតា។

បើក្រឡេកមើលពីសម្រស់ព្រៃភ្នំព័ទ្ធជុំវិញទាំងជួរៗនៅទីនោះវិញ លោកអ្នកក៏អាចផ្តិតយករូបភាពធម្មជាតិដ៏ស្រស់ត្រកាល រួមជាមួយនឹងសួនផ្កា ចម្ការដំណាំជាច្រើនប្រភេទជាដើម។ សម្រស់ធម្មជាតិព្រៃភ្នំប្រៀបបាននឹងឋានសួគ៌នេះ បានអន្ទងចិត្តភ្ញៀវទេសចរដែលបានទៅទស្សនាហើយជញ្ជក់មាត់សរសើរគ្រប់គ្នាតែម្តង។

អ្វីដែលកាន់តែពិសេសទៀតនោះ នៅមិនឆ្ងាយពីគ្នាប៉ុន្មាន ទីនោះក៏មានអារាមពុទ្ធសាសនាមួយដែលមានពុទ្ធបដិមារហូតដល់ ៨៤០០០ អង្គដែលភ្ញៀវទេសចរមួយចំនួនបានស្គាល់ឈ្មោះថា វត្តពុទ្ធគិរី ។ ដូចនេះក្នុងរដូវកាលបុណ្យភ្ជុំ ទីនោះពិតជាសក្តិសមបំផុតសម្រាប់អ្នកដែលមានបំណងប្រាថ្នាចង់ទៅធ្វើបុណ្យផង និងធ្វើដំណើរកម្សាន្តផងដោយមិនចាំបាច់ចំណាយពេលវេលាលើការធ្វើដំណើរច្រើន៕

អត្ថបទ៖ គង់ ចាន់ស្រីនុច