មន្ទីរទេសចរណ៍ខេត្តបាត់ដំបង ណែនាំឱ្យម្ចាស់រមណីយដ្ឋានតាមដងស្ទឹង បឹងបួរ ផ្អាកអាជីវកម្មជាបន្ទាន់

បាត់ដំបង៖ នៅថ្ងៃទី២០ ខែកញ្ញា ឆ្នាំ២០២០នេះ មន្ទីរទេសចរណ៍ខេត្តបាត់ដំបង បានណែនាំដល់ម្ចាស់រមណីយដ្ឋានដែលស្ថិតនៅតាមជ្រោះជ្រលងភ្នំ ដងស្ទឹង បឹងបួរ ឱ្យផ្អាកដំណើរការជាបណ្ដោះអាសន្នជាបន្ទាន់ ចាប់ពីថ្ងៃទី២០ ខែកញ្ញា រហូតដល់ថ្ងៃជូនដំណឹងសាជាថ្មី។

សេចក្ដីណែនាំរបស់មន្ទីរទេសចរណ៍ខេត្តបាត់ដំបង បានធ្វើឡើងដោយយោងតាមសេចក្ដីជូនដំណឹងរបស់ក្រសួងធនធានទឹក និងឧតុនិយម ស្ដីពីស្ថានភាពអាកាសធាតុដែលសង្កេតឃើញថា ខ្យល់មូសុងនិរតី បានបង្កើនល្បឿនយ៉ាងលឿនបក់មកលើប្រទេសកម្ពុជា ទទួលឥទ្ធិពលប្រព័ន្ធសម្ពាធទាបនលើសមុទ្រប៉ាស៊ីហ្វិក និងវិវឌ្ឍខ្លួនជាបន្តបន្ទាប់ទៅជាវិសម្ពាធទាប រួចក្រោយជាកូនព្យុះមួយ។

ក្រសួងធនធានទឹក និងឧតុនិយម បានជូនដំណឹងនាពេលថ្មីៗនេះថា ស្ថានភាពកូនព្យុះឈ្មោះនូល កើតមានលើប្រទេសកម្ពុជា ចាប់ពីថ្ងៃទី១៨ ដល់ ២០ ខែកញ្ញា ឆ្នាំ២០២០ ដែលបង្កជាភ្លៀងធ្លាក់ រលកសមុទ្រខ្ពស់ និង ជំនន់ទឹកភ្លៀងនៅតំបន់មួយចំនួន៕

អត្ថបទ៖ លាភ