ផ្ទុះជំងឺប៉េស្តជ្រូកអាហ្វ្រិកសាជាថ្មី នៅខេត្តភាគខាងត្បូងប្រទេសវៀតណាម

១ ឆ្នាំមុន

ខែកញ្ញា ២២, ២០២០ សង្គម

វៀតណាម៖ កសិដ្ឋានចិញ្ចឹមជ្រូក នៅខេត្តភាគខាងត្បូង ប្រទេសវៀតណាម ត្រូវបានអាជ្ញាធរ រកឃើញពីការផ្ទុះឡើងនូវជំងឺប៉េស្តជ្រូកអាហ្វ្រិកសាជាថ្មី ដែលបណ្ដាលឱ្យជ្រូកឈឺ។

ការផ្ទុះឡើងនៃជំងឺប៉េស្តជ្រូកអាហ្វ្រិក ត្រូវបានរកឃើញនៅក្នុងកសិដ្ឋានមួយ ដែលមានសត្វជ្រូកប្រមាណ ២៤ក្បាល ក្នុងសង្កាត់ Phuoc Dong ក្រុង Nha Trang ខេត្ត Khanh Hoa ។ មន្ទីរកសិកម្មខេត្តភាគខាងត្បូងវៀតណាមមួយនេះ បានបញ្ជាក់ពីការរកឃើញជំងឺប៉េស្តជ្រូកអាហ្វ្រិកនេះ កាលពីថ្ងៃអាទិត្យ ទី២០ ខែកញ្ញា ឆ្នាំ២០២០ បន្ទាប់ពីយកសំណាកសត្វជ្រូកចំនួន ៣ក្បាលពីកសិដ្ឋានខាងលើ ទៅធ្វើតេស្តនៅមន្ទីរពិសោធន៍។

អាជ្ញាធរវៀតណាម បានបន្តថា ម្ចាស់កសិដ្ឋានឈ្មោះ Nguyen Van Kiem មិនបានអនុវត្តតាមសេចក្ដីណែនាំទាក់ទងនឹងការការពារជំងឺឆ្លង និងបានលក់ជ្រូកឈឺ ដោយមិនបានរាយការណ៍ជូនអាជ្ញាធរមូលដ្ឋានឡើយ។ ម្ចាស់កសិដ្ឋានដដែលឱ្យដឹងទៀតថា គាត់បានទិញជ្រូកពីអ្នកលក់ម្នាក់ នៅស្រុក Cam Lam ខេត្តដដែល ដែលជំងឺប៉េស្តជ្រូកអាហ្វ្រិក បានផ្ទុះឡើងនៅទីនោះ កាលពីឆ្នាំ២០១៩។

សូមជម្រាបថា គិតត្រឹមថ្ងៃទី១៥ ខែធ្នូ ឆ្នាំ២០១៩ សត្វជ្រូកចំនួន ១៣៦០០ក្បាល ស្មើនឹង ៧៦០តោន ត្រូវបានអាជ្ញាធរវៀតណាម សម្លាប់និងបំផ្លាញចោល នៅខេត្ត Khanh Hoa នេះ៕