មនុស្ស ៩ ក្នុងចំណោម ១០នាក់ ជួបផលរំខានក្រោយជាពី COVID-19

ការសិក្សានៅកូរ៉េខាងត្បូង បានរកឃើញថា មនុស្ស ៩ នាក់ក្នុងចំណោម ១០ នាក់ ដែលបានជាសះស្បើយពីជំងឺ COVID-19 បានជួបប្រទះផលរំខានមួយចំនួន ក្នុងនោះបញ្ហាអស់កម្លាំងមានច្រើនជាងគេ។

ផលរំខានទាំងនោះមានអាការៈអស់កម្លាំង បញ្ហាផ្លូវចិត្ត ការបាត់បង់ក្លិន និងរសជាតិ ក្រោយពេលពួកអ្នកទាំងនោះបានជាសះស្បើយពី COVID-19។

លោក Kwon Jun-wook ជាមន្ត្រីអង្គភាពគ្រប់គ្រង និងបង្ការជំងឺរបស់កូរ៉េ (KDCA) បាននិយាយថា ការស្ទង់មតិតាមអ៊ីនធឺណិតនេះ ធ្វើលើអ្នកជំងឺ ៩៥៦ នាក់ និងបានរកឃើញអ្នកជំងឺ COVID-19 ចំនួន ៨៧៩ នាក់ ឬស្មើ ៩១,១% ឆ្លើយតបថា ពួកគេកំពុងជួបប្រទះផលប៉ះពាល់ពីជំងឺនេះយ៉ាងតិចមួយក្នុងចំណោមផលរំខានដែលបានរៀបរាប់ខាងលើ ហើយអាការៈអស់កម្លាំង គឺជាផលរំខានទូទៅជាងគេមាន ២៦,២% បន្ទាប់មកការផ្ដោតអារម្មណ៍មិនបានល្អ មាន ២៤,៦% ហើយផលប៉ះពាល់ផ្សេងទៀតដូចជាបញ្ហាផ្លូវចិត្ត និងការបាត់បង់រសជាតិ ឬ ក្លិន៕

ប្រភព៖ Hellokrupet