ថៃ ផលិតយន្តហោះចុះចតលើទឹក និងត្រៀមដាក់ឱ្យប្រើប្រាស់ជាផ្លូវការ

ថៃ៖ យន្តហោះដែលចុះចតលើទឹក ដែលផលិតដោយប្រទេសថៃ កំពុងស្ថិតក្នុងដំណាក់កាលនៃការធ្វើតេស្តដែលទទួលបានជោគជ័យ និងគ្រោងដាក់ឱ្យប្រើប្រាស់ជាផ្លូវការ ដោយវិទ្យាស្ថានស្រាវជ្រាវវិទ្យាសាស្ត្រ និងនវានុវត្តន៍ នៃប្រទេសថៃ។

យន្តហោះដែលចុះចតលើទឹករបស់ប្រទេសថៃ ត្រូវបានព្រះអង្គម្ចាស់ក្សត្រិយ៍ មហាចក្រី សិរិនថន ទ្រង់បានប្រសិទ្ធិនាម ថា ចាឡាកាសយ៉ាន (Chalakasyan) ដែលអាចផ្ទុកអ្នកបើកបរ ២នាក់។ លោក អាធីឆាត ព្រៃធីកាន់ នាយករងនៃវិទ្យាស្ថានស្រាវជ្រាវវិទ្យាសាស និងនវានុវត្តន៍ បានបញ្ជាក់ថា យន្តហោះនេះ ជាសមិទ្ធផលដំបូងរបស់ប្រទេសថៃ។

យន្តហោះ ចាឡាកាសយ៉ាន ត្រូវបានធ្វើតេស្តហោះហើរបាន ២០០ម៉ោង និងធ្លាប់ត្រូវបានប្រើប្រាស់នៅក្នុងលំហាត់សមយុទ្ធជួយសង្គ្រោះនៅក្នុងគ្រោះធម្មជាតិដោយសារទឹកជំនន់។ វាអាចហោះហើររហូតដល់ ៤ម៉ោង ជាមួយល្បឿន ១៥៣គីឡូម៉ែត្រក្នុងមួយម៉ោង និងល្បឿនអតិបរមា ២៦០គ.ម/ម ។ វិទ្យាស្ថានថៃ នឹងចុះបញ្ជីយន្តហោះនេះ ជាមួយអាជ្ញាធរអាកាសចរណ៍ស៊ីវិលថៃ នៅពេលខាងមុខនេះ៕

ប្រភព៖ Nation

ប្រែសម្រួល៖ លាភ