Connect with us

គណៈកម្មការមូលបត្រកម្ពុជា សម្រេចអនុញ្ញាតឲ្យគ្រឹះស្ថានមីក្រូហិរញ្ញវត្ថុហត្ថាកសិករ បោះផ្សាយលក់មូលបត្របំណុល ជាលើកដំបូង

ភ្នំពេញ ៖ យោងតាមសេចក្តីប្រកាសព័ត៌មាននៃលទ្ធផលកិច្ចប្រជុំគណៈកម្មការមូលបត្រលើកទី ៥៣ បានឲ្យដឹងថា គណៈកម្មការមូលបត្រកម្ពុជា សម្រេចអនុម័តដោយផ្តល់ការអនុញ្ញាតជាគោលការណ៍ លើសំណើសុំបោះផ្សាយលក់មូលបត្របំណុលជាសាធារណៈរបស់គ្រឹះស្ថានមីក្រូហិរញ្ញវត្ថុ ហត្ថាកសិករ ។
បើតាមគណៈកម្មការមូលបត្រកម្ពុជា គ្រឹះស្ថានមីក្រូហិរញ្ញវត្ថុហត្ថាកសិករ បានស្នើសុំបោះផ្សាយលក់មូលបត្របំណុលប្រភេទសញ្ញាបណ្ណធម្មតា (Plain bond) ក្នុងទំហំប្រាក់សរុប ១២០ ពាន់ លានរៀល មានតម្លៃចារឹកក្នុងមួយឯកតាមូលបត្របំណុល ១០០.០០០ រៀល អត្រាគូប៉ុងប្រចាំឆ្នាំចន្លោះពី ៧,៥០% ដល់ ៨,៥០% និង មានឥណប្រតិទានរយៈពេល ៣ ឆ្នាំគិតចាប់ពីកាលបរិច្ឆេទបោះផ្សាយ ដែលត្រូវទូទាត់គូប៉ុងរៀងរាល់ឆមាស ។


គណកម្មការ ក៏បានណែនាំ អោយគ្រឹះស្ថាន ត្រូវបន្តនីតិវិធីនៃការបោះផ្សាយលក់មូលបត្របំណុលអនុលោមតាមច្បាប់ និងបទប្បញ្ញត្តិជាធរមាន មុនទទួលបានការអនុញ្ញាតជាផ្លូវការក្នុងការចុះបញ្ជីលើទីផ្សារមូលបត្រកម្ពុជា។
សូមជម្រាបថា ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មការមូលបត្រកម្ពុជា (គ.ម.ក.) បានអញ្ជើញដឹកនាំកិច្ចប្រជុំ គ.ម.ក. លើកទី៥៣ និងបានសម្រេចលើឯកសារមួយចំនួន ៕

  • អត្ថបទទាក់ទង :
  • Featured
Loading...

ពេញនិយម