ស្ថានភាពនៅកោះភូកេត ពេលនេះអាក្រក់ជាងស្ថានភាពក្រោយរលកយក្សស៊ូណាមិទៅទៀត

ថៃ៖ សណ្ឋាគារប្រហែល ៣០០០ កន្លែង ត្រូវបិទទ្វារ ខណៈប្រជាជនប្រហែល ៣០ម៉ឺននាក់ បានរងផលប៉ះពាល់ ខ្លះបានបាត់បង់ការងារ ខ្លះកាត់ប្រាក់ខែ និងខ្លះត្រូវវិលត្រឡប់ទៅស្រុកកំណើតរបស់ពួកគេវិញ ដោយសារតែវិបត្តិកូវីដ១៩ ដែលបានបង្កផលប៉ះពាល់យ៉ាងខ្លាំងដល់បុគ្គលិក និងអាជីវករ នៅកោះភូកេត ប្រទេសថៃ។

កោះភូកេត ពឹងផ្អែកលើវិស័យទេសចរណ៍ ៨០% ប៉ុន្តែបច្ចុប្បន្ន ប្រទេសថៃ កំពុងបិទប្រទេសមិនអនុញ្ញាតឱ្យភ្ញៀវទេសចរទៅលេងកម្សាន្តឡើយ។ វាផ្ទុយស្រឡះពីឆ្នាំ២០១៩ ដោយកោះភូកេត បានទទួលភ្ញៀវទេសចរជាង ៩លាននាក់ ធ្វើឱ្យកោះនេះ ជាគោលដៅទេសចរណ៍ធំលំដាប់ទី២ បន្ទាប់ពីក្រុងបាងកក។

ប្រធានសមាគមសណ្ឋាគារប្រទេសថៃ លោក គង់សាក់ ខូពង់សាខន បានព្យាករថា វិស័យទេសចរណ៍នៅកោះភូកេត មិនអាចវិលត្រឡប់ទៅរកភាពប្រក្រតីវិញឡើយ ក្នុងរយៈពេល ៣ឆ្នាំ។ លោកបន្តថា ស្ថានភាពបែបនេះ គឺអាក្រក់ជាងស្ថានភាពក្រោយរលកយក្សស៊ូណាមិ ដែលបានវាយប្រហារកោះភូកេត កាលពីឆ្នាំ២០០៤ទៅទៀត៕

ប្រភព៖ AFP

ប្រែសម្រួល៖ លាភ