អ្នកលក់អាហារតាមផ្លូវ ត្រូវកត់សម្គាល់ឃើញថា បានលេចមុខនៅកន្លែងបាតុកម្មមុនគេ នៅថៃ

បាងកក៖ រាល់ទីតាំងដែលមានការប្រមូលផ្ដុំបាតុកម្ម គេសង្គេតឃើញថា តែងតែមានវត្តមានរបស់អ្នកលក់អាហារតាមផ្លូវ ដែលពួកគេ បានទៅដល់កន្លែងបាតុកម្មមុនគេបង្អស់។

សារព័ត៌មានថៃ បានចុះទៅដល់កន្លែងបាតុកម្ម ដោយសង្កេតឃើញមានអ្នកលក់អាហារ ដូចជា មាន់បំពង ប្រហិត និង សាច់ក្រកជាដើម។ ជាក់ស្ដែង ក្នុងរយៈពេល ១សប្ដាហ៍ចុងក្រោយនេះ អ្នកប្រើប្រាស់បណ្ដាញសង្គម បានចែកចាយនូវសកម្មភាពរបស់អ្នកលក់អាហារតាមដងផ្លូវ នៅតាមទីតាំងបាតុកម្ម ដែលត្រូវបានបង្ហោះនៅលើបណ្ដាញសង្គម twitter ។

អ្នកលក់មាន់បំពងម្នាក់ បានប្រាប់សារព័ត៌មានថៃ Khaosod ថា គាត់បានតាមដានផេកហ្វេសប៊ុកផ្លូវការមួយ របស់ក្រុមយុវជនដែលរៀបចំបាតុកម្ម ហើយគាត់បានទទួលដំណឹងពីកន្លែងដែលមានការជួបជុំ ទើបគាត់ទៅដល់កន្លែងនោះមុនគេតែម្ដង។ គាត់បន្តថា ក្នុងមួយថ្ងៃគាត់លក់ចំណេញច្រើនជាងថ្ងៃធម្មតា ជាង ៥០% ហើយលក់ឆាប់អស់ជាងសព្វដងផងដែរ៕

(ទស្សនាវីដេអូ)

ប្រភព៖ Khaosod

ប្រែសម្រួល៖ លាភ