កំណាត់ផ្លូវជាតិលេខ២, ៣ ផ្លូវព្រៃស និងផ្លូវលេខ២០A ដែលរងការខូចខាតដោយទឹកជំនន់ ត្រូវបានជួសជុលរួចរាល់

ភ្នំពេញ៖ ផ្លូវជាតិលេខ ២ ផ្លូវជាតិលេខ ៣ ផ្លូវព្រៃស និងផ្លូវលេខ 20A ចាប់ពីរង្វង់មូលកួរស្រូវ ខណ្ឌដង្កោ ដល់ស្រុកកណ្តាលស្ទឹង ដែលទទួលរងការខូចខាតធ្ងន់ធ្ងរដោយទឹកជំនន់ ត្រូវបានជួសជុលរួចរាល់ហើយ និងត្រូវបានដាក់ឱ្យធ្វើចរាចរណ៍ជាបណ្តោះអាសន្នផងដែរ។ នេះបើយោងតាមក្រសួងសាធារណការ និងដឹកជញ្ជូនរាជធានីភ្នំពេញ នៅរសៀលថ្ងៃអង្គារ ទី០៣ ខែវិច្ឆិកា ឆ្នាំ២០២០នេះ។

ដោយឡែក ផ្លូវលេខ២១៧ ចាប់ពីស្ពានព្រែកជ្រៃ ដល់រង្វង់មូលកួរស្រូវ បានដាក់ឱ្យធ្វើចរាចរណ៍ចំពោះរថយន្តទេសចរ ត្រីចក្រយានយន្ត និងទោចក្រយានយន្ត លើកលែងតែរថយន្តដឹកជញ្ជូនធុនធ្ងន់ប៉ុណ្ណោះ។

ចំពោះផ្លូវជាតិលេខ ៤ បាននិងកំពុងជួសជុល និងដាក់ឱ្យធ្វើចរាចរណ៍យានយន្តគ្រប់ប្រភេទ ខណៈទំនប់ស្ទឹងព្រែកត្នោតក្នុងសង្កាត់ស្ពានថ្ម ក៏បាននិងកំពុងជួសជុល និងអាចធ្វើចរាចរណ៍ជាធម្មតាឡើងវិញ៕

ប្រភព៖ មន្ទីរសាធារណការ និងដឹកជញ្ជូនរាជធានីភ្នំពេញ

អត្ថបទ៖ លាភ