អេលីត សាន់ ប្តេជ្ញាយកជ័យជម្នះនិងប្រាក់លានពី ឈុត សេរីវាន់ថង ឱ្យបាន

ភ្នំពេញ៖ អេលីត សាន់ អ្នកប្រដាល់គុនខ្មែរនៃក្លិប ប៉ែន កាក់គុនខ្មែរ បានបង្ហាញពីការតាំងចិត្តខ្ពស់ សម្រាប់ឱកាសប្រកួតជាមួយ ឈុត សេរីវាន់ថង ជាលើកទី២ បន្ទាប់ពីធ្លាប់ចាញ់ពិន្ទុ កាលពីជាង១ឆ្នាំមុនក្នុងការប្រកួតដណ្តើមពានលោកគ្រូ ម៉ា សេរី ។

ជំនួបលើកនេះកូនសិស្សរបស់លោក ស៊ន អេលីត បានបញ្ជាក់ថា រូបគេត្រៀមបានយ៉ាងល្អ ដោយតាំងចិត្តថាការប្រកួតនេះនឹងប្រឹងឱ្យអស់ពីសមត្ថភាព ហើយអាចនឹងមាននរណា ម្នាក់ត្រូវចុះចាញ់មុនចប់ពេញ៥ទឹក។

អេលីត សាន់ ធ្លាប់ចាញ់ពិន្ទុរាហ៊ូមាស ឈុត សេរីវាន់ថង ក្រោយប្រកួតយ៉ាងជក់ចិត្ត ពេញ៥ទឹក កាលពីពាក់កណ្តាលឆ្នាំ ២០១៩ ក្នុងការប្រកួតដណ្តើមពានលោកគ្រូ ម៉ា សេរី នាសង្វៀន CNC ។

សូមបញ្ជាក់ថា ការប្រកួតរវាង អេលីត សាន់ និង ឈុត សេរីវាន់ថង លើកទី២នេះនឹង ធ្វើឡើងនៅថ្ងៃទី ០៧ ខែ វិច្ឆិកា ២០២០ ក្នុងកម្មវិធីដណ្តើមប្រាក់លានខារ៉ាប៉ាវ ចាប់ពីម៉ោង ២ និង ៣០ នាទីរសៀល ដែលមានការផ្សាយផ្ទាល់តាមទូរទស្សន៍ CNC ៕