ក្រុមជើងឯក World Cup បារាំង បរាជ័យយ៉ាងគួរឱ្យភ្ញាក់ផ្អើល ក្រោមថ្វីជើងហ្វាំងឡង់

បារាំង៖ ក្រុមជម្រើសជាតិបារាំងដែលជាជើងឯក World Cup 2018 បានលេងចាញ់ក្រុមភ្ញៀវមកពីហ្វាំងឡង់ ក្នុងការប្រកួតមិត្តភាពកាលពីយប់មិញ។

ខ្សែប្រយុទ្ធរបស់ក្រុម Brentford កីឡាករ Marcus Forss ជាអ្នករកគ្រាប់បើកឆាកឱ្យហ្វាំងឡង់នៅនាទីទី២៨។ រំលងពីនោះ ៣នាទី ពោលគឺនាទី៣១ កីឡាករ Onni Valakari បានបន្ថែមមួយគ្រាប់ទៀតជួយក្រុមនាំមុខបារាំង ២-០ នៅវគ្គទី១។

បារាំងដែលបានដាក់កីឡាករល្អៗពេញជើងដូចជា Paul Pogba របស់ Manchester United, Lucas Digne របស់ Everton និង Olivier Giroud របស់ Chelsea មិនអាចរកគ្រាប់បាល់បានវិញឡើយ។ យ៉ាងណាលទ្ធផល ហ្វាំងឡង់ ២ បារាំង ០ បានរក្សាដល់ចប់ការប្រកួត។

សម្រាប់ប្រកួតបន្ទាប់ ក្រុមរបស់លោក Didier Deschamps នឹងត្រូវជួបប្រកួតទល់នឹង ក្រុមការពារជើងឯក Nations League ព័រទុយហ្គាល់ នៅយប់ថ្ងៃអាទិត្យខាងមុខ ខណៈហ្វាំងឡង់ត្រូវជួបប្រកួតជាមួយ ប៊ុលហ្គារី៕