Barcelona បរាជ័យក្នុងការព្រមព្រៀងជាមួយកីឡាករទៅលើការកាត់ប្រាក់ឈ្នួល

អេស្ប៉ាញ៖ ក្លិប Barcelona និងកីឡាកររបស់ខ្លួន បរាជ័យក្នុងការចរចា កាត់បន្ថយថ្លៃពលកម្មរបស់ពួកគេ កំឡុងពេលមានវិបត្តិសេដ្ឋកិច្ចក្នុងស្ថានភាពជំងឺកូវីដ-១៩ នេះ។

ក្លិបអ្នកមានបុណ្យ បានខាតបង់យ៉ាងធ្ងន់ធ្ងរនៅរយៈពេលជិត១ឆ្នាំចុងក្រោយនេះ ដោយសារ ទប់ទល់មិនបាននឹងការចំណាយ។ ក្លិបបានស្នើទៅកីឡាករទាំងអស់ឱ្យបន្ធូរបន្ថយថ្លៃពលកម្ម ដោយសរុបមកចុះសល់ត្រឹម ១៩១ លានអឺរ៉ូវិញ ដែលសម្រួលបានជាង ១០០ លានអឺរ៉ូធៀបនឹងការចំណាយពីដំបូង។

ប៉ុន្តែការចរចាកាលពីថ្ងៃពុធ មិនទាន់បានលទ្ធផលទេ គឺបញ្ចប់ទៅគ្មានការយល់ព្រមអ្វីទាំងអស់។ យ៉ាងណា កីឡាករមួយចំនួនបានសុំពេលសម្រេចចិត្ត ហើយនឹងផ្តល់ចម្លើយនៅថ្ងៃទី២៣ខែវិច្ឆិកា។ ក្នុងចំណោមនោះ Lionel Messi គឺជាខ្ទង់ចំណាយធំបំផុត ហើយក្លិបចង់ឱ្យរូបគេយល់ព្រមកាត់ថ្លៃពលកម្មដល់ទៅ ៣០ ភាគរយ។

បើ Barcelona មិនអាចដោះស្រាយបញ្ហានេះ នោះនៅឆ្នាំក្រោយពួកគេអាចនឹងជួបបញ្ហាក្ស័យធនហើយ ឬ ត្រូវបង្ខំចិត្តលក់កីឡាករសំខាន់ៗចេញ៕