សុខ សាវិន ប៉ះសិស្សប្អូន សូត្រ វាសនា ក្នុងកម្មវិធីថ្មី អាឡិចហ្សង់ ដែនដីអ្នកប្រយុទ្ធគុនខ្មែរ

ក្នុងនាមជាអ្នកប្រដាល់បទពិសោធច្រើនជាង សុខ សាវិន បង្ហើបថាមិនពិបាកខ្លាំងនោះទេក្នុងការប៉ះជាមួយសិស្សប្អូន សូត្រ វាសនា ក្នុងកម្មវិធីថ្មី អាឡិចហ្សង់ ដែនដីអ្នកប្រយុទ្ធគុនខ្មែរ នាថ្ងៃអាទិត្យ សប្តាហ៍នេះ។

កីឡាករនៅក្លិប ប៉ែន កាក់ គុនខ្មែរ ដែលកំពុងហ្វឹកហាត់ត្រៀមឡើងប្រកួតបានរៀបរាប់ថា អ្នកប្រដាល់ក្មេងៗជំនាន់ក្រោយមានការអភិវឌ្ឍបានល្អទាំងសមត្ថភាពទាំងបច្ចេកទេស ប៉ុន្តែរូបគេមានបទពិសោធច្រើនរួចមកហើយ ដូចនេះគិតថាមិនពិបាកខ្លាំង នោះទេសម្រាប់ការប្រកួតនេះ។

បន្ថែមលើកនេះកូនសិស្សរបស់លោក ស៊ន អេលីត មើលឃើញថាត្រកូល សូត្រ ម្នាក់នេះមាន ក្បាច់ទាត់និងធាក់ល្អ ស្របទៅនឹងកម្ពស់ក៏បានទៀត ដែលទាំងនេះជាចំណុចដែលរូបគេគិត ថាពិបាកក្នុងជំនួបនេះ ប៉ុន្តែរូបគេ ហ្វឹកហាត់ត្រៀមខ្លួនក៏បានល្អសម្រាប់ការប្រកួតនេះដែរ។

ការប្រកួតរវាង សុខ សាវិន និង សូត្រ វាសនា នឹងធ្វើឡើងនៅថ្ងៃអាទិត្យ ទី២២ ខែវិច្ឆិកា នេះនាសង្វៀន ស៊ី អ៊ិន ស៊ី ចាប់ពីវេលាម៉ោង ២:៣០ នាទីរសៀលតទៅ៕