អាកាសធាតុល្អបែបនេះ បើបានទៅស្រូបខ្យល់លើភ្នំ ៥៣ មិនដឹងស្រស់ស្រាយប៉ុណ្ណា

បាត់ដំបង៖ រមណីយដ្ឋានភ្នំ ៥៣ គឺជាតំបន់ទេសចរណ៍មួយកន្លែងស្ថិតនៅក្នុងភូមិភ្នំព្រឹក ឃុំភ្នំព្រឹក ស្រុកភ្នំព្រឹក ខេត្តបាត់ដំបង ដែលបានទាក់ទាញភ្ញៀវទេសចរជាច្រើនឱ្យទៅកម្សាន្តទីនោះ។

កន្លែងដែលសម្បូរទៅដោយទេសភាពធម្មជាតិ រួមជាមួយនឹងការកែច្នៃត្រង់ចំណុចមួយចំនួនធ្វើឱ្យភ្ញៀវដែលបានទៅដល់ទីតាំងនោះអាចផ្តិតយករូបភាពស្រស់ស្រាយជាច្រើនមិនខកបំណងឡើយ។

ទិដ្ឋភាពព្រៃភ្នំខៀវស្រងាត់ឆ្ងាយដាច់កន្ទុយភ្នែក និងខ្យល់អាកាសបរិសុទ្ធធ្វើឱ្យភាពនឿយហត់ទាំងប៉ុន្មានរំសាយអស់ និងផ្តល់នូវអារម្មណ៍ស្រស់ស្រាយត្រឡប់មកវិញ។ ក្រៅពីទេសភាពស្រស់ស្អាតហើយ ភ្នំ ៥៣ ថែមទាំងមានទឹកធ្លាក់ត្រជាក់ៗឱ្យកម្សាន្តបានយ៉ាងសប្បាយ ព្រមទាំងមានលក់ម្ហូបអាហារដែលជាភាពងាយស្រួលមួយសម្រាប់ភ្ញៀវទេសចរមិនឱ្យពិបាកក្នុងការស្វែងរកម្ហូប ឬ ភេសជ្ជៈឡើយ៕