Connect with us

ទោះដើរលេងច្រើនប៉ុនណា ក៏មិនបារម្ភខ្លាចឈឺ បើចេះតិចនិកទាំងនេះ

នៅពេលដែលយើងចេញដើរលេង វាពិបាកណាស់ទៅហើយក្នុងការថែទាំរាងកាយ និងសុខភាពបានល្អ ពិសេសនៅពេលត្រូវដើរលេងពេលថ្ងៃឈប់សម្រាកយូរជាដើម។ ជឿថា មានគ្នាយើងខ្លះ បើដើរលេងច្រើនផង ឬញ៉ាំអាហារផ្ដេសផ្ដាសច្រើនទៀត ច្បាស់ជាឈឺ មានអារម្មណ៍ថាមិនស្រួលខ្លួន ហើយបែរជាដើរលេងលែងកើតវិញ។ ហេតុនេះហើយ បើយើងចេះតិចនិកមើលថែសុខភាពបានល្អ ទោះដើរលេងច្រើនថ្ងៃ ច្រើនកន្លែងក៏សុខភាពមិនចុះខ្សោយដែរ។

១.គេងឱ្យបានគ្រប់គ្រាន់

អ្នកណាក៏ដូចអ្នកណា ឱ្យតែពេលបានទៅដើរលេង ដឹងតែសប្បាយចិត្តពេក រហូតខ្លះគេងមិនលក់ក៏មាន។ ការគេងមិនបានគ្រប់គ្រាន់ អាចធ្វើឱ្យយើងញ៉ាំច្រើន វិលមុខ និងអាចប៉ះពាល់ដល់អារម្មណ៍បាន។ ពេលយប់មុនដើរ យើងគួរគេងឱ្យបាន ៦-៩ម៉ោង ឬបើគេងមិនបានច្រើនពេលយប់ យើងអាចសម្រាកនៅតាមផ្លូវជំនួសក៏បាន។

២.ញ៉ាំអាហារពេលព្រឹកល្អ

ពេលធ្វើដំណើរតាមផ្លូវទៅដល់គោលដៅ យើងមិនសូវខ្វាយខ្វល់នឹងអាហារដែលយើងញ៉ាំទេ ភាគច្រើនគិតថា ញ៉ាំអីក៏បានឱ្យឆ្អែតៗពោះទៅ ជាពិសេសអាហារពេលព្រឹក។ តែយើងត្រូវដឹងថា អាហារពេលព្រឹកជាអាហារសំខាន់ជាងគេក្នុងមួយថ្ងៃៗ ហេតុនេះ គួរញ៉ាំអាហារពេលព្រឹកល្អៗ ជួយផ្ដល់ថាមពល ដើម្បីកុំឱ្យយើងឆាប់អស់កម្លាំងតាមផ្លូវ។

៣.ញ៉ាំទឹកឱ្យបានច្រើន

យើងគួរញ៉ាំទឹកឱ្យបានច្រើន ឬបើអាចគួរតែញ៉ាំថ្នាំវីតាមីនបំប៉នបន្ថែម ជាពិសេសសម្រាប់គ្នាយើងណាដែលត្រូវជិះយន្តហោះ ឬឡានមានមនុស្សច្រើន។ យកល្អ ញ៉ាំទឹក និងពពួកវីតាមីន C ដើម្បីជួយការពារខ្លួនពីជំងឺមួយចំនួនដែលអាចបំផ្លាញថ្ងៃសប្បាយរបស់យើង។

៤.ធ្វើចលនារាងកាយឱ្យបានច្រើន

មានគ្នាយើងខ្លះ ពេលទៅដើរលេងម្ដងៗមិនសូវជាធ្វើចលនារាងកាយ បញ្ចេញជាតិពុលចេញក្នុងខ្លួនទេ។ ម៉្យាងវិញ ពេលទៅដើរលេង ពិបាកហាត់ប្រាណទៀត ប៉ុន្តែយើងអាចបញ្ចេញញើសបន្តិចបន្តួច ដោយការដើរមើលទេសភាព ពេលសម្រាកបាយថ្ងៃត្រង់ ឬប្រើអាងហែលទឹក កន្លែងហាត់ប្រាណ ឬដើរពេលព្រឹកព្រលឹមក៏បាន។

៥.គ្រប់គ្រងស្ត្រេស

ជួនកាល ពេលដើរលេងឃើញមនុស្សច្រើនពេក អាចធ្វើឱ្យអារម្មណ៍បែរជាធុញ កើតស្ត្រេសវិញ។ ដូចនេះ បើកើតស្ត្រេសពេលដើរលេង យើងអាចរកកន្លែងស្ងាត់ៗ មិនសូវសម្បូរមនុស្ស ឬអាចធ្វើសមាធិ ឬមួយយូហ្កាពេលព្រឹកព្រលឹម ដើម្បីរំសាយអារម្មណ៍ក៏ល្អ។

បន្ថែមពីលើនេះ ពេលយើងទៅដើរលេង មិនត្រូវភ្លេចលាងដៃជាមួយសាប៊ូ ឬជែលឱ្យបានញឹកញាប់ រក្សាគម្លាតពីមនុស្សដទៃ ពាក់ម៉ាសឱ្យបានត្រឹមត្រូវ និងមានការប្រុងប្រយ័ត្នខ្ពស់ចំពោះការឆ្លងជំងឺកូវីដ-១៩៕

ប្រភព៖ Hello គ្រូពេទ្យ

  • អត្ថបទទាក់ទង :
  • Featured
Loading...

ពេញនិយម