កីឡាករបាល់ទាត់វ័យចាស់ជាងគេលើលោកបន្តកិច្ចសន្យាថ្មី ជាមួយក្លិប Yokohama FC

ជប៉ុន៖ ខ្សែប្រយុទ្ធ Kazuyoshi Miura វ័យ៥៣ឆ្នាំ ដែលត្រូវចាត់ទុកជាកីឡាករបាល់ទាត់អាជីពវ័យចំណាស់ជាងគេក្នុងលោកនាពេលបច្ចុប្បន្ន បានសម្រេចបន្តកុងត្រាថ្មីរយៈពេល១ឆ្នាំទៀតជាមួយក្លិប Yokohama FC។

ជាមួយកុងត្រាថ្មីនេះ នឹងនាំឱ្យ Kazuyoshi Miura អាចឈានដល់រដូវកាលទី ១៧ ជាមួយក្លិប ក្រោយផ្ទេរមកចូលរួមនៅឆ្នាំ ២០០៥ និងជារដូវកាលទី ៣៧ ក្នុងអាជីពជាកីឡាករបាល់ទាត់ ពេលលោកចាប់ផ្តើមអាជីពដំបូងជាមួយក្លិប Santos ក្នុងប្រទេសប្រេស៊ីលនៅឆ្នាំ ១៩៨៦។

សូមបញ្ជាក់ថា លោក Miura បានជាប់ឈ្មោះជាកីឡាកររកបានគ្រាប់បាល់នៅវ័យចំណាស់បំផុត ដែលលើកចុងក្រោយលោកធ្វើបានគឺនៅឆ្នាំ ២០១៧ ពេលលេងទល់ក្លិប Thespakusatsu Gunma ដែលកាលនោះមានអាយុ ៥០ ឆ្នាំ និង ១៤ ថ្ងៃ៕