រមណីយដ្ឋាន “ប្រាសាទបន្ទាយទ័ព” ត្រូវបានឱ្យប្ដូរឈ្មោះ កុំឱ្យប្រជាពលរដ្ឋភាន់ច្រឡំ

ខេត្តព្រះសីហនុ៖ ក្រសួងវប្បធម៌ និងវិចិត្រខេត្តព្រះសីហនុ បានណែនាំ ម្ចាស់រមណីយដ្ឋានកែឆ្នៃថ្មីមួយកន្លែង ស្ថិតនៅចំណុចតាដួង តាអាំ ក្នុងភូមិអូរតាប៉ាង ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ ឱ្យប្ដូរឈ្មោះរមណីយដ្ឋានកែឆ្នៃថ្មីនេះជាបន្ទាន់ ដើម្បីកុំឱ្យប្រជាពលរដ្ឋមានការភាន់ច្រឡំ ជា ប្រសាទបន្ទាយទ័ព ។

រមណីយដ្ឋាននេះ មានឈ្មោះថា ប្រាសាទបន្ទាយទ័ព បានបង្កឱ្យមានការភាន់ច្រឡំជាមួយទីតាំងប្រាសាទបុរាណ “បន្ទាយទ័ព” ពិតប្រាកដ ដែលជាប្រាសាទប្រត្តិសាស្ត្រជាតិ នៅក្នុងទឹកដីនៃខេត្តបន្ទាយមានជ័យ។

ចំពោះករណីនេះ ក្រសួងវប្បធម៌ និងវិចិត្រសីល្បៈ បានផ្ញើលិខិតមួយច្បាប់មកប្រធានមន្ទីរវប្បធម៌ និងវិចិត្រសិល្បៈខេត្តព្រះសីហនុ ឱ្យចុះណែនាំម្ចាស់រមណីយដ្ឋានកែឆ្នៃថ្មីមួយនេះ ផ្លាស់ប្តូរឈ្មោះ មិនឱ្យដាក់ឈ្មោះថាប្រាសាទបន្ទាយទ័ពទៀតឡើយ។

សូមបញ្ជាក់ថា រមណីយដ្ឋានកែឆ្នៃថ្មីមួយនេះ មានរូបចម្លាក់ថ្មីច្រើនប្រភេទ ដែលឆ្លាក់ចេញពីផ្ទាំងថ្មនៅនឹងកន្លែងខ្លះ និងនាំយកមកពីខាងក្រៅខ្លះ បង្កើតបានជាទស្សនីយភាព បែបធម្មជាតិ និងសិល្បៈ ទាក់ទាញការចាប់អារម្មណ៍ខ្លាំងពីមហាជន ដោយសារតែការរៀបចំរចនានេះ មើលទៅស្រដៀងទៅនឹងទីតាំងប្រាសាទបុរាណ បង្កប់ក្នុងល្អាងជ្រោះភ្នំ៕