តោះ! ចូលឆ្នាំចិនខាងមុខនេះ បើមិនបានដើរទៅណាឆ្ងាយ ត្រឹមរមណីយដ្ឋានព្រៃសហគមន៍ “ចំបក់” ក៏បានដែរ

កំពង់ស្ពឺ៖ តាមបណ្តោយផ្លូវជាតិលេខ ៤ តាមច្រកចូលផ្លូវឧទ្យានជាតិគិរីរម្យដោយហួសប្រមាណ ១៦ គីឡូម៉ែត្រ លោកអ្នកនឹងឃើញស្លាកសញ្ញានៅខាងឆ្វេងដៃនៃតំបន់ព្រៃសហគមន៍ចំបក់ មិនខានដែលទីនោះគឺជាតំបន់កម្សាន្តបែបធម្មជាតិមួយជាទីចាប់អារម្មណ៍របស់ភ្ញៀវទេសចរជាតិ និងអន្តរជាតិ។

បើគិតចម្ងាយពីភ្នំពេញទៅទីនោះ ចំណាយពេលធ្វើដំណើរត្រឹម ២ ម៉ោងប៉ុណ្ណោះ លោកអ្នកនឹងអាចដកយកបទពិសោធន៍ដំណើរដើរព្រៃបែបសហគមន៍បានដោយអាចទៅវិលល្ងាច ឬ គេង ២-៣ យប់ក៏បាន។ ដូចនេះតំបន់ព្រៃសហគមន៍ចំបក់ នេះគឺជាតំបន់កម្សាន្តមួយកន្លែងដ៏ល្អសម្រាប់អ្នកមិនមានគម្រោងទៅណាឆ្ងាយក្នុងឱកាសបុណ្យចូលឆ្នាំចិនដែលនៅមិនប៉ុន្មានថ្ងៃខាងមុខនេះ។

សកម្មភាពនានាដែលភ្ញៀវទេសចរអាចកម្សាន្តបានតាមបែបធម្មជាតិនោះមានដូចជាបោះតង់ ជិះរទេះគោ ឬ កង់ទស្សនាព្រៃប្រឹក្សា សម្រស់ធម្មជាតិ ឡើងភ្នំងូតទឹកជ្រោះត្រជាក់ៗដូចទឹកអម្រិត ទស្សនាការសម្តែងសិល្បៈពេលរាត្រី ឈ្វេងយល់ពីសិប្បកម្មសហគមន៍ ឈ្វេងយល់ពីរបៀបធ្វើនំក្រឡានរបស់អ្នកស្រុកនៅទីនោះ។

សម្រាប់អ្នកដែលចូលចិត្តដំណើរកម្សាន្តបែបព្រៃភ្នំ ទីនោះពិតជាសាកសមខ្លាំងដោយលោកអ្នកអាចក្រោកពីព្រលឹមដើម្បីឡើងភ្នំថ្មើរជើង ស្រូបយកខ្យល់អាកាសបរិសុទ្ធ ស្តាប់សម្លេងបក្សាបក្សី ឆ្ពោះទៅកាន់ល្អាងប្រចៀវ ព្រៃឬស្សី និងទឹកជ្រោះទាំង ៦ ជាន់ផងដែរ។ ដូចនេះ សម្រាប់អ្នកដែលមិនទាន់មានគម្រោង ឬ អ្នកដែលសម្រេចចិត្តភ្លាមៗតែមិនដឹងទៅណា រមណីយដ្ឋានព្រៃសហគមន៍ចំបក់ គឺជាទីកន្លែងកម្សាន្តមួយដែលលោកអ្នកមិនគួររំលង៕