មិនចង់ពិបាកអ្នកដទៃ បុរសម្នាក់លោតចូលភ្នក់ភ្លើងសម្លាប់ខ្លួន នៅប្រទេសថៃ

ថៃ៖ បុរសម្នាក់ បានសម្លាប់ខ្លួន ដោយបានលោតចូលក្នុងភ្នក់ភ្លើង ក្នុងវត្តមួយ នៅភាគខាងឦសានប្រទេសថៃ កាលពីថ្ងៃចន្ទ ទី២២ ខែកុម្ភៈ ឆ្នាំ២០២១ ខណៈអ្នកស្គាល់បុរសនេះបានប្រាប់ថា គាត់ បានមានជំងឺបេះដូងប្រចាំកាយយូរយារណាស់មកហើយ។

មុនធ្វើអត្តឃាត បុរសខាងលើ បានផ្ញើសារទៅកាន់មិត្តភ័ក្តិរបស់ពួកគេចំនួន២នាក់ ថា “ខ្ញុំមិនអាចទ្រាំរស់នៅបានទៀតទេ”។ ហេតុការណ៍នេះ កើតឡើងនៅវត្ត Pa Suan Nhoi ។

ពេលទៅដល់ទីតាំងកើតហេតុ សមត្ថកិច្ច និងអ្នកពន្លត់អគ្គិភ័យ បានប្រទះឃើញភ្លើងកំពុងឆេះ ដែលបុរសនោះបានប្រើប្រាស់ឈើដើម្បីដុត។ នៅពេលភ្លើងត្រូវបានពន្លត់ ទើបគេប្រទះឃើញឆ្អឹងមនុស្ស ហើយនៅក្បែរនោះ ក៏ប្រទះឃើញម៉ូតូកង់បី១គ្រឿង ដែលមានផ្ទុកសម្ភារឧបករណ៍ជួសជុលម៉ូតូ។

បុរសខាងលើ ត្រូវបានរាយការណ៍ថា មានឈ្មោះ Chaiyum Sornharn អាយុ ៥០ឆ្នាំ។ គាត់ក៏បានបង្ហោះសារចម្លែកៗនៅលើហ្វេសប៊ុក ដូចជា “លាហើយមិត្តភ័ក្តិទាំងអស់គ្នានៅថ្នាក់ទី៣ ជូនពរសុខសប្បាយ ស្រឡាញ់អ្នកទាំងអស់គ្នា” និង “ខ្ញុំអស់កម្លាំងណាស់ ខ្ញុំមិនអាចសូម្បីតែដើរ អភ័យទោសខ្ញុំផង ខ្ញុំមិនអាចទ្រាំរស់នៅបានទៀតទេ”៕

ប្រភព៖ Bangkok Post